O Durán Maquinaria Ensino segue de celebración e suspira tras acadar o obxectivo de entrar na Copa da Raíña. “O equipo está moi contento, vendo que se fixo un traballo moi bo. Era un obxectivo moi moi ambicioso”, declara o seu adestrador, Carlos Cantero.
Unha vitoria ante o Zamarat Quesos El Pastor permitiu que as lucenses quedaran na oitava posición, con 22 puntos, ao peche da primeira volta. Todo un éxito para o Ensino, nunha tempada na que había planteis competidores moi fortes e na que a priori resultaba máis difícil entrar no torneo. Conxuntos como o Cadi La Seu, Campus Promete e Kutxabank Araski quedaron rozando a clasificación.
“Quedan por detrás de nós equipos superiores en plantel, equipos que xogan competición europea. De aí a dificultade de ter conseguido este obxectivo, que era moi ambicioso”, sinalou Cantero.
Carlos Cantero: “Quedan por detrás equipos superiores en plantel, equipos que xogan competición europea”
Lograr esta meta é un éxito competitivo para o club, pero tamén para o propio adestrador, que se mostra emocionado pola clasificación. “É un éxito moi grande para min, para o club e para as xogadoras que adestro. Chéame de orgullo”, declara.
Pasada a primeira volta e a tensión por entrar na Copa, o average xa no importa tanto. Por iso, para o próximo partido, ante un rival superior como é o Perfumerías Avenida, o técnico chama ao seu plantel a xogar desfrutando e sen presión. O Ensino viaxa a Salamanca para disputar o partido o sábado, 19 de decembro, ás 18:00 horas para comezar a segunda volta.
