Cantero (CB Ensino): "Sabemos o perigo que ten Nyingifa"

Tras a derrota da semana pasada do Durán Maquinaria Ensino contra o Perfumerías Avenida , o adestrador do conxunto lugués, Carlos Cantero, afrontaba unha nova fin de semana con enfrontamento na Liga Endesa. As galegas mediranse ao Movistar Estudantes, equipo no que milita Jennifer Atonye Nyingifa, a súa xogadora franquicia.

A deportista nixeriana, que foi adestrada por Carlos Cantero durante tempada e media, perfílase como a maior ameaza do equipo madrileño. O adestrador do CB Ensino salienta por riba das individualidades o gran xogo coral que leva a cabo o seu próximo rival.

Este gran xogo grupal non é froito da casualidade, senón que ten gran relevancia o feito de que o seu contrincante leve anos traballando co mesmo adestrador, como o mesmo Cantero se encargou de clarificar. Desta maneira levan á cancha unhas ideas de xogo moi claras.

“Sabemos do perigo que ten Nyingifa. Conocémola moi ben individualmente e, a parte de adestrar conmigo ano e medio, hai xogadoras que levan 3 anos xogando contra ela aquí en España.”

Preguntado polos puntos débiles do Movistar que podería aproveitar o seu equipo na fin de semana, o preparador destacou que “eu creo que lles falta un pouco de peso con respecto a nós nas xogadoras interiores. É certo que ao Girona fixéronlle dano con situacións de postes abertos e de “pop” que tamén nos poden facer daño a nós, pero xa vimos que elas teñen un punto débil aí.”

Ademais, mostrouse tranquilo e engadiu que “se facemos un bo xogo dentro-fóra e un bo xogo en chegadas creo que será difícil que nos paren”.

“As novas incorporacións están cada vez máis adaptadas”, di o adestrador do Ensino

Outro dos temas dos que falou na sua comparecencia ante os medios o adestrador lugués foi o referente ás novas incorporacións que rexistra o equipo de cara a esta nova tempada, despertando moita curiosidade entre a prensa o estado no que se atopaban as novas xogadoras.

Ao ser cuestionado sobre o tema, Cantero afirmou que “están cada vez mellor adaptadas táctica e fisicamente.” Destacou que esta última cuestión era a que rexistraba a maior diferencia entre elas, xa que “cada unha chegou nunha semana diferente da pretempada”.

Malia iso, deixou claro que poderá contar con todas as xogadoras de cara ao choque contra a escuadra madrileña.

Cantero: “Marta Blanco, Chatrice White e Alba Prieto son casos diferentes”

Seguindo coa temática das incorporación, ao ser preguntado polo que poderían aportar as tres novas fichaxes ao equipo de Lugo, Cantero quixo aclarar que pese a que as tres estarán dentro da convocatoria desta semana, cada unha se atopa nunha fase diferente da súa adaptación ao equipo. “Marta Blanco, Chatrice White e Alba Prieto son casos diferentes”, explica Carlos Cantero.

No caso de Marta Blanco destacou que “vén do seu primeiro ano senior, ten que coñecer a categoría, as compañeiras e a Liga. Ademáis ten que adaptarse ao nivel físico do que é unha categoría senior.”

Respecto á xogadora estadounidense Chatrice White afirmou que “leva semana e media, o seu punto chave é fisicamente máis que tacticamente, pouco a pouco vai a guantando máis nos entrenos e iso irá sumándose en minutos se o rendemento así o considera.”

Pola súa parte, ao falar de Alba Prieto non dudou en destacar que “as sensacións son moi positivas. É unha moza que compite moi ben”. Malia isto, deixou claro que “o que está a transmitir nos adestramentos é que lle quedan varios chanzos de progresión por dar na súa carreira e esperamos dalos con ela aquí”.

O partido entre Movistar Estudiantes e Durán Maquinaria Ensino, da segunda xornada da Liga Endesa, terá lugar o vindeiro sábado 26 ás 18:00 horas no pavillón Antonio Magariños de Madrid. Arbitrarán o choque os colexiados: Asier Quintas Álvarez, Juan Manuel Uruñuela, e Javier Ávila Zurita.