Hai máis de tres décadas que unha ducia de futbolistas abriron camiño no deporte feminino. Coa súa paixón, valentía, sacrificio e constancia sentaron as bases do fútbol sala actual. Falamos das 12 mulleres que conformaron a primeira Selección Española feminina de futsal. Nela había nada menos que catro futbolistas galegas: Beatriz Seijas (Sal Lence), Verónica Díaz (Meirás), María Varela (Sal Lence) e Ana Silva (Sal Lence).
Naquel partido entre España e Portugal, rematou cun resultado de 4-1 para as rojillas. Disputouse na localidade coruñesa de Narón o 29 de decembro de 1990, o conxunto español estivo conformado por doce futbolistas que foron convocadas polo seleccionador, Roberto Amado, para entrar a formar parte, para sempre, da historia do deporte español:
Porteiras
- Ana Ruiz – Sampedrotarra
- Esperanza Mas – Son Oliva
Peches
- Mª Cruz Gómez – Intermadrid
- Gema García – Intermadrid
- María Varela – Sal Lence
- Marta Quirós – San Francisco
Alas
- Verónica Díaz – Meirás
- Ana Silva – Sal Lence
- Mª Luisa Cortés – Son Oliva
- Manuel Lago – Sampedrotarra
Pivots
- Ángeles Rodríguez – Sampedrotarra
- Beatriz Seijas – Sal Lence
A destas deportistas, como a de todas as pioneiras, foi unha loita a favor da igualdade que continúa e que elas iniciaron para as futuras xeracións. As mulleres que integraron a primeira Selección Española de fútbol sala merecían un recoñecemento e acábano de recibir en terras galegas, concretamente en Valdoviño.
Homenaxe no concello de Valdoviño
O Concello de Valdoviño quixo rendirlles homenaxe a esta ducia de mulleres como un dos actos ligados ao 8M, o Día Internacional da Muller. Foi un acto emotivo e moi merecido, no que a participación de Roberto Amado, seleccionador dese primeiro equipo, resultou clave.
A Real Federación Galega de Fútbol, tamén estivo no acto. A pandemia de COVID-19 impuxo unha posta en escea sobria e cun público moi reducido, pero non foi obstáculo para que esa primeira Selección Rojilla sentise o orgullo que o futsal sente por elas e polo que significan.
O evento tivo lugar na Casa da Cultura de Valdoviño, e o concelleiro de Deportes, Sergio Saavedra, foi o encargado de facer as presentacións e, botando unha ollada ao pasado, puxo en valor o destacado papel de Valdoviño no fútbol sala feminino a través de dous equipos míticos, o Lago e o Meirás.
Pablo Prieto, presidente do Comité de Fútbol Sala da RFGF, agradeceu o papel que xogou aquela primeira selección a favor da igualdade e Roberto Amado, o seu adestrador, repasou con nostalxia anécdotas deses primeiros tempos.
Xunto con Prieto tamén estiveron presentes o presidente do Comité Galego de Adestradores e director da Escola, Iván Cancela; e Abraham Yáñez, delegado da RFGF en Ferrol.
O alcalde de Valdoviño, Alberto González, pechou o acto asegurando que mulleres como Beatriz Seijas, Verónica Díaz, María Varela ou Ana Silva, son auténticos referentes a seguir no mundo do deporte.
As catro futbolistas galegas que foron integrantes desa extraordinaria Selección e estiveron presentes na homenaxe de xeito presencial, no caso de Verónica Díaz e María Varela, e a través de videochamada, no caso de Beatriz Seijas e Ana Silva.
Vídeo do primeiro partido da Selección Española feminina de fútbol sala
Deixámosvos incorporado a esta información esta interesante reportaxe audiovisual que Ana Amado ten colgada na súa canle de YouTube. Nela recóllense imaxes, fotografías, recortes de prensa, e testimonios de pioneiras como María Varela, Beatriz Seijas, Ana Silva e Verónica Díaz.
Nesta peza, tal e como di Roberto Amado, pódense ver “imaxes do primeiro partido internacional da Selección Española Feminina de Fútbol Sala, que tiven a honra de dirixir (Narón, 29-12-1990). Hoxe o fútbol sala feminino español é un deporte referente dentro e fóra das nosas fronteiras, como o demostran a Eurocopa lograda por España, ou a recente mención do Burela como mellor equipo do mundo. Detrás desos éxitos está a inmensa labor de moitas persoas. O meu reconocimiento e felicitación ás Pioneiras que abriron camiño”.
Roberto Amado, primeiro seleccionador de España de fútbol sala feminino: “Detrás dos éxitos do fútbol sala feminino español na actualidade está a inmensa labor de moitas persoas. O meu reconocimiento e felicitación ás Pioneiras que abriron camiño”
