Non hai sistema ofensivo nin defensivo para derrotar ás pantasmas. Nin estratexia, nin pizarra. Sumar puntos, en determinadas situacións, pode ser necesario, obrigatorio ou mesmo de ouro. Pero na situación que atravesa o Dépor ABANCA, equipo revelación da tempada pasada, sumar é como respirar: vital.
O partido do pasado domingo contra o Atlético de Madrid, un dos mellores equipos da Liga Iberdrola, non fixo máis que afondar nunha ferida xa aberta de por si. Sete goles é un saco o suficientemente pesado como para producir dor nunhas costas pouco acostumadas a sentir algo así, pero que se achega tendenciosamente a ser o habitual.
Sete goles a favor e vinteséis en contra para non sumar ningún punto tras oito encontros. Son unhas cifras que nin nos peores augurios do pesimismo tiñan cabida. As Nosas teñen diante de si o encontro máis relevante nas súas vidas profesionais. Resetear e comezar de cero para facer valer a súa posición de potencial conxunto destinado a facer cousas grandes.
Fazaña, con todas as letras. Este ano máis ca nunca, sin o alento dunha bancada que significa moito nunha situación así. Coa confianza de saber que, de superar isto, vaise superar practicamente todo o que veña.
Crer, pensar que é posible. Ese é o partido máis importante que están a prepar agora mesmo as rapazas de Manu Sánchez. O credo co que toda a bancada branquiazul ten que comulgar, lonxe. Como lonxe, tamén parecen, outros tempos mellores, que de seguro voltarán. Máis cedo que tarde.
