O Concello da Coruña abrirá ao público este sábado 18 de marzo a nova grada cuberta do campo norte das instalacións deportivas municipais de San Pedro de Visma. Esta nova estrutura contou cun orzamento superior aos 250.000 euros e dará servizo ás persoas usuarias deste campo.
“Con esta actuación buscamos dar resposta ás peticións que tiñamos por parte de pais, nais e afeccionados que asistían todas as semanas a estes campos e nos que non había espazos onde cubrirse da chuvia”, sinalou a alcaldesa Inés Rey. A nova marquesiña está situada nun dos dous campos destas instalacións municipais e o seu obxectivo é protexer aos espectadores fronte as inclemencias meteorolóxicas.
A nova zona cuberta das instalacións de Visma ten unhas dimensións de 280 metros cadrados e está na grada situada enriba do edificio de vestiarios. Tamén foi necesario intervir no espazo entre ambos campos para reforzar a estrutura. A actuación completouse cunha mellora da iluminación da grada e unha actualización da evacuación de pluviais.
