O atletismo galego en categoría máster triunfa por todo o alto. Tras a celebración do Campionato de España desta categoría, a expedición galega voltou cun total de trinta medallas de ouro, dazanove pratas , dazanove bronces, un récord mundial, un de España e once récords galegos. Destes, sete ouros, nove pratas, doce bronces, un récord de España e un récord galego foron de probas femininas.
A atleta individual máis destacada foi Ana Abuín, do Atlética A Silva, quen se colgou tres ouros, na categoría F60 competindo nos concursos de peso, onde acadou a marca de 7,92, martelo, chegando aos 28,42 e martelo pesado (10,75).
No plano das probas por equipos, o CA Sada resultou vencedor no 4×100 F60, cun equipo formado por Miriam Ripoll, Esther Martínez, Elva Fernández e María Luisa Armesto. Así mesmo, cunha marca de 1:15.13, as máster galegas superaron o récord de España na categoría. No mixto 55 da mesma proba, o Sada tamén resultou vencedor.
Os ouros das máster galegas
Ademais destas marcas, o atletismo galego seguiu acadando éxitos da man das atletas femininas. Luz Domínguez, do Burgas Ourense, subiu ao máis alto do podio nos 400m do F55, cun tempo de 1:12.34.
Esther Pedrosa, do Playas Castellón, sumou outro primeiro posto galego nos 1.500 m. F60, cun tempo de 5:24.50. Así mesmo, Ángeles Bernárdez, do Samertolameu, alzouse co triunfo en lonxitude F50, acadando a marca de 4,34.
As medallas de prata
A estes ouros galegos engadíronse tamén diversas pratas. Rosario Sureda, do LUCUS Caixa Rural, colgouse dúas, unha nos 200m F55, e outra en altura, na mesma categoría. Pola súa parte, Esther Pedrosa, do Castellón, superou o récord galego nos 800m F60, alcanzando a segunda posición. Tamén subiu á posición de prata Luz Domínguez, do Burgas Ourense, na proba dos 800m F55, cun tempo de 2:46.22.
De novo, o CA Sada demostrou o seu alto nivel en máster, con grandes actuacións das súas atletas. María Luisa Armesto, foi segunda nos 200 m F70, Pilar Márquiza, fixo o propio nos 800m F65, Ángeles Ripoll, sumou outra medalla ao CA Sada, nos 5.000 F60 e Irene Fernández, tamén acadou unha prata no lanzamento de martelo F45.
A nviel grupal, o CA Sada, foi o segundo mellor nos 4×100 mixto 35 e Mixto 50.
Os bronces
Os bronces máster femininos galegos chegaron da man de Ángeles Rodríguez, do Atlética A Silva, colgouse tres medallas da terceira posición, nos concursos de peso, martelo pesado e xavelina F60.
María Luisa Armesto acadou bronces por partida dobre, nos 100m e nos 400m F70. As súas compañeiras de equipo Pilar Márquiz e Inés Papín, en 400m F55 e 1.500m F50 respectivamente, tamén sumaron metais. Irene Fernández, tamén do CA Sada, acadou o bronce en martelo pesado F45.
Na proba dos 5.000m marcha F45, Emilia Rodríguez, do SA Trega foi a terceira mellor clasificada, cun tempo de 27:46.26. Finalmente, o Samertolameu foi un dos clubs máis destacados, co bronce de Helena Rodríguez nos 400m F55, o de Ángeles Bernárde en lanzamento de xavelina F50 e na proba de 4×100 mixto 45, na que as atletas superaron ademais o récord galego, cunha marca de 4:29.10.
