Luis Nogueira, na mente do atletismo galego esta fin de semana xa que o Campionato de Galicia Máster de Pentathlon de Lanzamentos está adicado a este atleta retirado hai unhas tempadas.
As probas autonómicas desta fin de semana, marcan o remate dun mes de marzo que de maneira progresiva vai dando paso a unha nova tempada de aire libre.
Serán preto de catrocentos atletas quenes tomen parte tanto no Campionato de Galicia Máster de Pentathlon de Lanzamentos, como nas probas de medio fondo e fondo correspondentes ao Campionato de Galicia Sub-10, Sub-12 e Sub-14 que non se poideron desenvolver por protocolo COVID o pasado fin de semana en Ourense.
Respectando en todo momento os protocolos de seguridade e extremando as medidas sanitarias, o CGTD de Pontevedra verá novamente o domingo polas súas instalacións, a celebración de dous Campionatos de Galicia e o desenvolvemento dunha xornada de control de aire libre.
Lembranza da figura de Luis Nogueira
Tal e como explica a Federación Galega de Atletismo, “este ano o cartel do pentathlon de lanzamentos máster está adicado a Luis Nogueira, queridísimo e admirado atleta retirado fai unhas tempadas como consecuencia dunha grave e irreversible enfermidade. A gran calidade humana do atleta do ADAS Proinor, vai da man de todo un amplo e salientable currículo deportivo onde destacan as cinco plusmarcas nacionais máster e os varios títulos de campión mundial de aire libre que Luis Nogueira acadou na modalidade de xavelina”.
Na competición de Pentatlón Lanzamentos de 35-49 contará co concurso de Elisabeth Oya Steinbruggen, Irene Fernández Fidalgo, do CA Sada, e María José Fraga Graña da Atlética A Silva. Na competición de Pentatlón Lanzamentos de 50-59 participa Marta Sureda González, mentres que na de 60-74 tomarán parte Ana María Abuin Pazos da Atlética Silva e María de los Ángeles Rodríguez del Río, do mesmo club.
A medallista internacional María de los Angeles Rodríguez e a plusmarquista española Ana Abuín ambas compartindo tanto a categoría F60 como o clube de A Silva, estarán tomando parte tamén neste campionato no que José Manuel Almudí do ADAS Proinor, con 80 anos, será o atleta con maior idade dos participantes.
Na categoría masculina, nesta homenaxe contribuirán destacadas e destacados atletas máster como a do Campión de Galicia Absoluto de combinadas 2020 Carlos Ferrer do Atletismo Narón na categoría M60.
LISTA DE ATLETAS INSCRITAS/OS CAMPIONATO DE GALICIA DE PENTATHLON DE LANZAMENTOS MASTER
Campionato de Galicia Sub-10, Sub-12 e Sub-14 fondo e medio fondo
Paralelamente dará comezo ás 10.30 horas o Campionato de menores sobre as probas de 500 m., 1.000 m. e 2.000 m., contando con nada menos que cun total de 34 carreiras sobre estas distancias.
Ao igual que xa presenciamos a semana pasada na pista cuberta de Expourense, estas probas contarán cunha alta participación de atletas pertencentes a máis de cincuenta clubs achegados de todos os puntos da nosa Comunidade.
LISTA DE ATLETAS INSCRITAS/OS XIV CAMPIONATO DE GALICIA INVERNO SUB-10, SUB-12 E SUB-14
