Despois de tres meses nos que se celebraron cinco eventos internacionais e trece xornadas da Copa Galicia, a histórica temporada autonómica de ciclocrós 2022 baixa o pano este domingo co seu Campionato de Galicia que se vai celebrar en Poio.
A localidade pontevedresa será o escenario dende as 9:30 horas das batallas polas coroas ás que optan ciclistas de quince categorías. As intensas chuvias caídas durante as últimas horas e unha previsión meteorolóxica cargada de auga garanten moita lama e espectáculo no circuíto da Seca.
#CampionatoCX22 | Comezamos o 2️⃣0️⃣2️⃣3️⃣ coa semana da cita máis agardada da temporada autonómica de ciclocrós
✍️ https://t.co/kKOCL7xCX7 pic.twitter.com/yunKvF1uHW
— F_Galega de Ciclismo (@F_Gal_Ciclismo) January 2, 2023
O Campionato de Galicia – V Ciclocrós Poio Móvese presentará un trazado de tres quilómetros de lonxitude no que, ademais do barro, os 250 participantes terán que superar en cada volta obstáculos e zonas de area.
A proba organizada polo Poio Bike Club e o Concello de Poio, en colaboración coa Federación Ciclismo Galego, despide o calendario autonómico e trátase da última competición previa ao Campionato de España, que terá lugar a vindeira semana en Vic.
Ao igual que o resto de citas disputadas esta campaña na nosa comunidade, esta proba de Poio tamén repartirá puntos para o ranking da Real Federación Española de Ciclismo ao estar catalogado como un evento de clase 1.33.5.
Orde das carreiras
O programa de carreiras de Poio arrancará cunha primeira quenda na que entrarán en acción tres categorías másters masculinas: 30, 50 e 60. A continuación, ás 10:30 h., comparecerán os máster-40. Tras un alto ás 11:30 h. para adestrar, a competición volverá a escena ás 11:45 h. cos cadetes e ás 12:30 h. comezará a manga feminina coas corredoras elite, Sub-23, juniors, cadetes e másters. Para as 13:30 h. está fixada a celebración da Proba Inclusiva e para as 14:00 h., a saída dos elites, Sub-23 e juniors masculinos.
Por último, e como colofón da xornada, rodarán polo circuíto as rapazas e rapaces do pelotón Infantil, unha actividade de promoción sen títulos do Campionato de Galicia en xogo.
Hai once categorías nas que están aseguradas as remudas nos tronos autonómicos, ben sexa por ausencia ou ben polo cambio de grupo de idade da vencedora ou vencedor hai un ano en Maceda.
Pola súa banda, aspiran a repetir vitoria Marina González (Illas Cíes) nas máster-40, Andrés Calvete (Monte Xalo) nos máster-40, Marcial Rodríguez (QueBici-Marcisport) nos máster-50 e Manuel González Ojea (Bici O Con) nos máster-60. Atendendo aos resultados das últimas semanas na Copa Galicia, o elite Samuel González (Máis Que Bicis) e a Sub-23 Laura Mira (Supermercados Froiz) parten como rivais a bater nas quendas raíñas.
Agárdanse a máis de 300 deportistas no Ciclocrós Poio Móvese
Na presentación da proba, a concelleira de Deportes do Concello de Poio, Marga Caldas, acompañada por integrantes e o máximo responsable do Poio Bike Club, Francisco Albar, e do presidente da Federación Ciclismo Galego, Juan Carlos Muñiz, deron a coñecer os detalles da quinta edición do Ciclocrós Poio Móvese
A proba é por primeira vez Campionato de Galicia de ciclocrós. Deste xeito, tras as catro probas previas, será no circuíto que se habilitará na contorna da Seca e da Reiboa onde se decidan as competicións nas categorías de elite, sub-23, junior, cadete e Máster 30, 40, 50 e 60 tanto masculinas como femininas. Prevese a participación de máis de 300 deportistas.
Ver esta publicación en Instagram
“É un circuíto esixente, que obrigará ás e aos participantes a dar o mellor de si e que a bo seguro suporá un gran atractivo para as persoas que se acheguen a gozar da proba como espectadores”, vaticinou Marga Caldas.
A edil de Deportes de Poio lembrou que durante o desenvolvemento da proba, así como nas horas previas, habilitarse un dispositivo especial de seguridade, no que tomarán parte a Policía Local e Protección Civil. Ademais, Caldas tamén quixo agradecer e poñer en valor o “espectacular traballo” que desenvolve o Poio Bike Club á hora de “facer canteira e acadar grandes resultados nesta modalidade. Cada ano son máis as crianzas que se animan a probar esta disciplina, ao que hai que sumar os enormes éxitos que os e as integrantes do club acadan habitualmente en diferentes probas”.
Por último, Marga Caldas tamén fixo fincapé na importancia de que esta proba adquira un carácter autonómico, non só polo feito de que “temos garantida a presencia dos e das mellores competidoras de Galicia”, senón tamén porque “é un paso máis á hora de consolidar ao noso concello como referente na organización de probas deportivas de gran nivel, en diferentes modalidades, unha aposta que imos continuar mantendo desde a Administración local”.
