Un total de 21 atletas (10 galegas e 11 galegos) tomarán parte durante esta fin de semana no Campionato de España Sub-16 que se disputará no Pazo dos Deportes de Oviedo e que xuntará a un total de 276 participantes.
Entre as nosas e nosos representantes, destaca a participación de Xela Martínez, corredora do Atlética Lucense, quen acude en calidade de máxima atracción do campionato. A fondista lucense acaparará toda a atención logo da exhibición do pasado fin de semana onde lograba o récord de España Sub-16 e Sub-18 nos 3.000 m. cun rexistro de 9:28.34.
Malia elo, serán os 1.000 m. a proba escollida por Xela Martínez e o seu adestrador para compitir en Oviedo, a donde acude co récord galego e a mellor marca das participantes con 2:49.31.
Xunto a atleta lucense tamén haberá que seguir con especial atención a participación da deportista Lisa Vosverg do AVA quen acude xusto unha semana despois de establecer o pasado fin de semana durante o Campionato de Galicia Sub-16, un novo récord galego de pértega con 3.35 m.
Outras participacións que, sobre o papel poderían realizar intervencións interesantes neste estatal Sub-16 de atletismo serán as de Antía Pernas do Lucus Caixa Rural Galega nos 60 m., Adriana Rial do Samertolomeu nos valos, Candela Sánchez do San Miguel de Marín nos 1.000 m. ou a de Sara Guedes da Atlética Lucense nos 3.000 m, por citar só algunhas das deportistas galegas con opcións.
Relación de atletas masculinos
Na categoría masculina un dos destacados será Sergio Quintas do C.D. La Purísima, quen acude ca terceira mellor marca dos participantes nos 1.000 m. con 2:40.94 (AL), tamén cómpre salientar o concurso do atleta Daniel Salgueiro do Coruña Comarca nos 600 m.
CONSULTA AQUÍ TODA A INFORMACIÓN DO CAMPIONATO DE ESPAÑA SUB-16 DE ATLETISMO
