- Vila Concepción acolleu a presentación dunha iniciativa do CBS Cambre a prol da igualdade de xénero no deporte.
- No acto estiveron presentes o edil de Deportes, Daniel Mallo, a secretaria do CBS Cambre, María Fernanda Jóver, o tesoureiro, Juan Alonso, e o delegado do equipo de División de Honra, Avelino Otero.
Unha ferramenta para promover os dereitos, empoderar, previr a violencia e integrar. Estas son algunhas das características e beneficios que a secretaria do Club de Béisbol e Sófbol Cambre, María Fernanda Jóver, atribúe ao deporte. Jóver entende que “todas as persoas podemos ser e pertencer e temos o mesmo dereito a practicar deporte e ser respectadas, con independencia do noso xénero”.
⚾️ O @CBSCambre reivindica a igualdade de xénero na súa nova campaña, que estará en marcha o que queda de ano.
👉 Entre as iniciativas inclúense a publicación de contidos de sensibilización, actividades cos nenos e nenas da categoría alevín e a celebración de dous torneos. pic.twitter.com/eDBro1IOnV
— Concello de Cambre (@ConcelloCambre) November 18, 2022
Precisamente, a igualdade e a loita contra a violencia machista serán os eixos centrais da nova campaña do CBS Cambre. A iniciativa presentouse onte en Vila Concepción e, no acto, tomaron parte o edil de Cultura, Deportes e Xuventude do Concello, Daniel Mallo, a secretaria da entidade, o tesoureiro do Club Béisbol Sóftbol Cambre, Juan Alonso, e o delegado do equipo de División de Honra, Avelino Otero.
A campaña estará en marcha durante o que queda de ano e incluirá as seguintes iniciativas: publicación de contidos de sensibilización a través das redes sociais do CBS Cambre, organización dunha actividade cos nenos e nenas da categoría alevín e, por último, a celebración de dous torneos. Estes últimos terán lugar este mesmo fin de semana no pavillón do Temple.
Torneos do CBS Cambre en prol da Igualdade
Mañá, sábado, 19 de novembro, a instalación municipal acollerá o Torneo a favor da Igualdade entre homes e mulleres coa participación dos equipos da categoría Sénior – Xuvenil Feminino, CBS Cambre Oro e do CBS Cambre Prata.
O domingo, día 20, será o Torneo a favor da loita pola tolerancia e a non violencia de xénero. Nel, tomarán parte as categorías Alevín do CBS Cambre Oro, o CBS Cambre Prata, o Club Lume A e o Club Lume B.
Durante a súa intervención, o concelleiro do Concello Daniel Mallo felicitou ao club pola iniciativa desexando que, nalgún momento, “non sexan necesarias estas campañas porque xa exista unha igualdade real entre homes e mulleres. En todo caso, mentres que non cheguemos a ese punto, contaredes coa colaboración e a axuda do Concello para seguir poñendo en marcha este tipo de propostas”.
