O HC Deportivo Liceo festexaba esta fin de semana o seu ascenso á Ok Liga Feminina. Non será a primeira vez que as liceístas militen na elite do hoquei a patíns estatal. O seu retorno está máis que merecido.
Quedan tres xornadas para o final da competición e matematicamente xa están ascendidas. Logo de dez partidos xogados seguen invictas. So cederon senllos empates ante CP Alcorcón e CP Las Rozas.
Nos seus cánticos de celebración escoitouse aquelo de:
“El día que me muera / yo quiero mi cajón / pintado verde y blanco / como mi corazón”
Pero o que máis chamou a atención foi a camiseta que se puxeron para celebrar. Axiña, ás persoas que estabamos na distancia, picounos a curiosidade sobre que dicía ese texto impreso que as galegas do HC Deportivo Liceo elixiran para conmemorar esta data de felicidade.
O misterio despexouno o club a través dun chío en twitter:
Moitos preguntades pola mensaxe das nosas camisetas do ascenso. É a seguinte.
Orgullosos da nosa orixe.#Liceístas pic.twitter.com/Gar311NZNf
— Hockey Club Liceo (@HockeyclubLICEO) May 23, 2021
Así, prevendo a posibilidade de poder gañar en Iruña, nas maletas coruñesas ademais dos sticks, os patíns, as proteccións e as elásticas para xogar ante o UDC Rochapela, viaxaron tamén estas camisetas coas que as coruñesas quixeron deixar claro o “orgullo da nosa orixe” elixindo nada menos que a Castelao para facelo.
“A nosa galeguidade provén da fortaleza do espírito, e aínda que carecemos de vontade ofensiva somos inexpugnables na resistencia”
CASTELAO ‘Sempre en Galiza’
É ben certo que o hoquei a patíns ten en Cataluña un lugar onde a súa práctica é moi destacada. Pero cada vez máis, desde diferentes puntos do Estado, hai equipos que chegan á Ok Liga. Nesta tempada houbo representación asturiana con ENE Oposiciones Cuencas Mineras e o Areces Ecopilas Asturhockey, madrileña, co CP Alcorcón, e galega, xa que este estivo na elite o HC Borbolla.
Xustamente as tomatitas, aínda que non o ten doado, soñan con acompañar ás súas veciñas verdibrancas na máxima categoría o próximo curso 2021-22. Imaxinan o que suporía para a proxeción do hoquei galego feminino en Galicia contar con dous equipos na elite? Cantas rapazas máis se apuntarían a atarse as botas dos patíns e coller o stick?
No hoquei masculino, durante anos, precisamente o HC Deportivo Liceo constitúe unha resistencia que, desde o noroeste peninsular, plántalle cara ao liderado catalán. Os liceístas teñen arrebatado títulos e gloria non poucas veces a clubs cataláns do nivel do FC Barcelona. Son o club máis laureado de Galicia. E seguen, ano tras ano, demostrando que este deporte dos patíns está moi vivo na Coruña e noutros lugares de Galicia.
