- As carreiras de aventura, con polo menos unha muller por equipo, son pioneiras na igualdade de xénero e a loita polos dereitos da muller no deporte.
- Un centenar de mulleres tomarán parte no Raid Gallaecia-AR World Championship 2021 e dez delas capitanearán ás súas respectivas formacións.
- “A separación de xénero non existe neste deporte, teño un 25% de responsabilidade, como calquera outro membro do equipo”, expresa Nicolau.
Só faltan 1 día para o pistoletazo de saída do Raid Gallaecia-AR World Championship 2021, que se disputará do 2 ao 9 de outubro en Galicia, o Campionato do Mundo das carreiras de aventura, unha disciplina mixta, con polo menos unha muller por equipo, pioneira na igualdade de xénero e na loita polos dereitos da muller no deporte.
Un centenar de mulleres tomarán parte no Raid Gallaecia-AR World Championship 2021 e dez delas capitanearán aos seus respectivos equipos:
- Camila Nicolau (BOA Brazil Multisport).
- Natalia Manzhay (Blizzard).
- Carin Goldblatt (Raiders of the Lost Arc).
- Magdalena Stachura (Beskidy).
- Esther Pizarro (Silice Itaca).
- Melody Hazi (Renegades).
- Paulina Andrea Mosquera (Gallaecia Raid Aventura).
- Kate White (Strong Machine).
- Anna Clelia Ponteri (Freemind Italia).
- Séverine Vandermeulen (Buval Belgium).
Con 18 anos de experiencia nas carreiras de aventura, sete vitorias nas Series Mundiais e varios Campionatos do Mundo nas súas pernas, a brasileira Camila Nicolau (São Paulo, 1985) é unha referencia no seu país. Deportista multidisciplinar, compaxina os adestramentos e a competición coa Oficina Multisport, empresa de consultoria deportiva que creou xunto ao seu marido, Guilherme Pahl, tamén integrante do BOA. E, desde fai catro anos, Camila é a mamá de Kilian. Unha nai coraxe no Raid Gallaecia-AR World Championship 2021.
Practicaches rafting, snowboard, bicicleta de montaña… e todo con bos resultados, pero levas 18 anos nas carreiras de aventura, que significa para ti este deporte?
CAMILA NICOLAU: Sempre me gustou facer deporte, pero as carreiras de aventura encántanme porque son unha analogía da vida. Sempre digo que en cinco días de proba pasan como cinco anos de vida. As leccións que saco deste deporte son únicas e axúdanme moito a evolucionar como ser humano.
Con polo menos unha muller por equipo, as carreiras de aventura son pioneiras na igualdade de xénero, sentes que o teu papel é tan importante como o dos homes?
CAMILA NICOLAU: Si, é algo bastante impresionante das carreiras de aventura. A separación de xénero non existe neste deporte e camiñamos xuntos axudándonos en todo momento. Teño un 25% de responsabilidade, como calquera outro membro do equipo, e todos somos importantes. Pero sen dúbida neste deporte podemos mostrar a forza feminina e sacar proveito das nosas calidades como a resiliencia.
A maternidade é un tema tabú no deporte de competición, como viviches ti ese proceso?
CAMILA NICOLAU: A miña parella e eu xa estabamos a planear ter un fillo e quedeime embarazada nun moi bo momento da miña carreira deportiva. Ao principio foi un shock, pero aos poucos acepteino e gustoume. Cando Kilian tiña 3 meses, Vidaraid convidoume a participar na Expedición Guaraní.
Ao principio negueime pensando que non podería prepararme en cinco meses, pero coa axuda de Gui (Guilherme Pahl) dei un importante paso ao renovar relativamente pronto a miña rutina de adestramento e viaxar para a miña primeira carreira só oito meses despois de dar a luz.
Durante a proba necesitaba aleitar nas zonas de transición e contei co apoio dunha amiga que levou ao meu fillo e coidouno durante a carreira.
Agora ten catro anos, entende moi ben cando nos toca competir e durante as nosas viaxes queda coa súa avoa (a miña nai) e ambos se divirten moito.
Nunca competiches en Galicia, que expectativas tes unha vez que se desvelaron algúns detalles do percorrido?
CAMILA NICOLAU: Será unha carreira moi dura e moi diferente ás que estamos afeitos. Desafortunadamente, un membro do noso equipo tivo un accidente a semana pasada e tivemos que chamar a outro para completar o equipo. Agora estamos completos e confiados novamente para este desafío.
Será a miña primeira vez en España e por iso non quero crear ningunha expectativa, só gozar de cada unha das longas etapas que teño por diante, dando o mellor de min e traballando en equipo para conseguir un bo resultado.
BOA Brazil Multisport chega nun gran momento de forma tras gañar a Expedición Guaraní, das Series Mundiais, sentides como un dos equipos favoritos?
CAMILA NICOLAU: Esta será unha competición con máis de 90 equipos e hai varios con posibilidades de gañar. Creo que por primeira vez en moitos anos non hai un claro favorito e conto polo menos 10 equipos dispostos a disputar o posto máis alto do podio. Seremos a única selección brasileira e para nós é un soño levar a nosa bandeira todo o máis alto, pero somos conscientes de que teremos moito traballo e respectamos moito a todos os grandes equipos presentes.
Con sete vitorias nas Series Mundiais na túa palmarés só falta un podio no Campionato do Mundo, é un soño para ti?
CAMILA NICOLAU: Por suposto, é un soño gañar unha ARWC. Non só polo título, senón que será a recompensa de longos anos de traballo e dedicación a este deporte que transformou a miña vida.
