O Concello de Cambre despedirá a programación do 8M con varias propostas para promover e visibilizar a figura da muller no mundo do deporte. As iniciativas consistirán en catro proxeccións, dúas delas dirixidas a toda a cidadanía e outras dúas para o alumnado do IES David Buján e o Alfonso X O Sabio.
O concelleiro de Deportes, Daniel Mallo, incide en que o obxectivo destas actividades “é reivindicar e visbilizar ou papel das mulleres non eido deportivo, un ámbito fundamental para acadar unha sociedade igual e xusta para homes e mulleres”.
Deporte para todo o público na Vila Concepción
Por unha banda, Vila Concepción de Cambre acollerá o vindeiro venres, 25 de marzo ás 19:30 horas, a exhibición dos documentais ‘Campioas Esquecidas’ e ‘Karbo, escola de fútbol’. O primeiro conta a historia do Medina, o único conxunto galego de baloncesto que xogou a Copa de Europa.
Aquí podedes ver o trailer de ‘Campioas Esquecidas’, de Veinticinco Producciones:
O segundo relata as vivencias das antigas xogadoras do equipo coruñés de fútbol Karbo, que gañou, ata en catro ocasiones, a máxima competición española.
Unha vez conclúan, haberá un coloquio sobre ambas as proxeccións no que poderá participar o público asistente. O aforo será limitado, polo que as persoas interesadas deberán chamar ao teléfono 981 65 62 17 para reservar a súa entrada.
Irene, protagonista nos centros educativos
Polo outro lado, segundo informa o Concello de Cambre, tamén se levará a cabo a presentación de “Irene, a porteira” no IES Alfonso X O Sabio e no IES David Buján. As citas serán o 24 de marzo ás 11:20 horas no primeiro centro e o 28 de marzo ás 17:20 horas no segundo.
A peza audiovisual está protagonizada por Irene González, coruñesa que xogou de porteira con dez mozos no equipo Irene CF nos anos 20 do século pasado. Trátase dun caso único no mundo. En ambos os casos, a actividade complementarase cunha charla posterior sobre a loita da muller no deporte, especialmente, no mundo do fútbol.
