O Gran Premio Ciclismo – Concello de Oia estreouse no calendario o pasado sábado e fíxoo como cuarta e última xornada da Copa Galicia do Porvir para tres categorías. As cadetes, os cadetes e as juniors pecharon o seu certame autonómico de Estrada nunha cita na que o chanzo máis alto do podio estivo reservado para o Cambre-Renault Caeiro, tal e como informa a Federación Ciclismo Galego. O conxunto coruñés protagonizou un trío de triunfos con ciclistas que lucían as camisolas de líderes.
O percorrido de 45 quilómetros deseñado polo Ciclismo Oiense transitaba polas estradas dos concellos de Oia, A Guarda e O Rosal. Neste itinerario pola comarca do Baixo Miño ascendeuse o porto de montaña da Cruz da Portela, co seu cumio a 15 km da liña de meta. Gañador en Carballo e segundo clasificado en Boiro e en Cambados, o cadete Diego López tiña garantida matematicamente a xeral da Copa Galicia e ao seu título púxolle a guinda sendo o máis rápido na liña de meta de Mougás. O representante do Cambre-Renault Caeiro bateu por 5 segundos de diferenza a Unai Fernández (O Rosal) e a Aarón Lorenzo (Compostelano), segundo e terceiro respectivamente.
No ranking final cadete, o vencedor en Oia sumou 540 puntos polos 250 de Aron González e os 245 de Diego Souto (Vigués).
Un pleno de vitorias asinou Alejandra Neira na Copa Galicia do Porvir cadete feminina. A vixente subcampioa de España de contra o reloxo individual impúxose nesta ocasión con 1’13” de vantaxe sobre Irene Signo (Lynalfa-Ponteareas). A 3’08” da santiaguesa do Cambre-Renault Caeiro rematou a súa compañeira de equipo Ivet Ivanova, que grazas ao seu terceiro posto en Oia ascendeu á segunda praza da xeral, adiantando por 40 puntos a Nerea Suárez (Carballo), terceira clasificada no ranking igualada a 360 puntos con Irene Signo.
A terceira categoría do certame coordinado pola Federación Ciclismo Galego (FCG) que se resolveu neste evento foi a júnior feminina.
A ausencia de Andrea Prado (Becani) aseguraba o títul a Lara Fuentes. Esa circunstancia non provocou a relaxación da ciclista do Cambre-Renault Caeiro e por 13″ de marxe na meta decantou ao seu favor o duelo con Xiana Camiña (Becani), apuntándose deste xeito o seu terceiro triunfo parcial desta campaña. Vania Gregores (Lynalfa-Ponteareas) fixo terceira en Mougás.
Lara Fuentes, vencedora no 2022 da xeral cadete, estivo escoltada no podio da Copa Galicia por dúas juniors do Becani: Xiana Camiña, segunda, e Lucía Ballester, terceira.
Xunto ás cadetes e ás xuvenís competiron as elites e sub23. Carla Fernández (Quebici-Marcisport) dominou esta carreira por diante de Laura Mira (Farto-BTC) e a terceira praza obtívoa María Jesús Barros (Supermercados Froiz), sendo a primeira elite.
En canto ás categorías de escolas, inscribiron o seu nome na listaxe de gañadoras e gañadores Vega Aldrey (Cambre-Renault Caeiro) e Gonçalo Correia (Landeiro) en infantís, Estela Yáñez (Tríatlon Coruña) e Mateo Hermida (Avanza-O Porriño) en alevíns, Alma García (Tríatlon Coruña) e Xoán Sande (Barbanza) en principiantes, e Iria Ruíz (Betanzos) e Iván Lázaro (O Rosal) en promesas.
Os premios da primeira edición do Gran Premio Ciclismo – Concello de Oia encargáronse de entregalos Cristina Correa, alcaldesa de Oia; Modesto Pereira, concelleiro de Deportes; Aser Estévez, presidente do Ciclismo Oiense; e Óscar Sánchez e Jacobo Ucha, directivo e técnico da FCG.
A Copa Galicia do Porvir 2023 aínda non finalizou. Resta a última xornada júnior masculina, o Trofeo Júnior Carballo fixado para o 26 de agosto. Toda a información sobre este circuíto de probas podes atopala na súa sección dentro desta páxina web e nas redes sociais a través do cancelo #CopaGaliciaPorvir23.
