A área de A Coruña acollerá este sábado unha proba de orientación por equipos na que participarán máis de 250 deportistas, e que se desenvolverán nos municipios de Culleredo, Cambre, Carral e A Laracha. Trátase da II Proba da Liga Galega e Española de Raids de Aventura, segundo informa a Federación Galega de Orientación (FEGADO). Haberá dous percorridos: iniciación, desde as 10:00 ás 16:00 horas, e elite, das 10:00 ás 00:00 horas.
O Raid Gallaecia Race Vente21 é unha proba puntuable da Liga Galega e Liga Española de Raids, acollendo tamén o Campionato de España Xuvenil de Seleccións Autonómicas (CERA Xuvenil).
As disciplinas nas que participarán as persoas inscritas son múltiples e variadas. Orientación, kaiak, bicicleta, trekking, rappel, orientación a pé específica, balizas de memoria e tamén unha proba de equilibrio.
Esta proba da liga Galega e Liga Española de Raids é unha carreira da modalidade de Aventura, na que o percorrido é secreto para os participantes, que só coñecen os puntos de control, por onde deben pasar cando se lles entrega un mapa no momento da saída.
Para garantir o total cumprimento do protocolo COVID-19, o límite de inscrición marcouse en 90 equipos.
