O Club de Remo Cabo da Cruz proclamouse gañador da Bandeira de Traíñas Deputación da Coruña, tanto na modalidade masculina coma na feminina.
A proba, que reúne cada verán aos mellores clubs de remo da provincia, volveu a celebrarse este ano nas augas da ría de Corcubión, tras ser suspendida a edición do ano pasado debido á pandemia da COVID-19.
Un total de 18 clubs (doce masculinos e seis femininos) disputaron a Bandeira, nunha espectacular competición de 3 millas naúticas que congregou a numeroso público para seguir as evolucións das embarcacións nunha vila que conta cunha gran tradición mariñeira.
Na competición feminina participaron un total de seis equipos: o Club do Mar de Mugardos, o Club de Regatas Perillo, o C.R. Cabo da Cruz, C.R. Rianxo, C.R. Puebla e C.R. Náutico de Ribeira.
O presidente da Deputación, Valentín González Formoso, e a deputada de Deportes, Cristina Capelán, foron as persoas encargadas de facer entrega das Bandeiras ás tripulacións gañadoras, é dicir a feminina e a masculina do Club de Remo Cabo da Cruz.
A Deputación da Coruña destina 25.100 euros en premios aos equipos participantes, segundo informa o ente provincial.
Valentín González Formoso, presidente provincial coruñés, salienta que a competición feminina chegue á súa “segunda edición”, e asegura que “o remo feminino ten moitos éxitos por diante e vainos dar moitas alegrías na provincia da Coruña”
González Formoso manifestou a súa satisfacción porque a situación sanitaria permita este ano “recuperar unha proba que é toda unha tradición cada verán nas costas da provincia da Coruña” e facelo ademáis “cunha competición feminina que este ano chega a súa segunda edición, porque o remo feminino ten moitos éxitos por diante e vainos dar moitas alegrías na provincia da Coruña”.
O presidente felicitou ás gañadoras e gañadores da Bandeira 2021 e agradeceu a impecable organización do evento, a cargo da Federación Galega de Remo que preside José Manuel Seijas.
