- Un novo triunfo do CR Cabo da Cruz, esta vez en Mugardos, achega aínda máis ao título ás remeiras da traiñeira de Boiro.
As tres competicións da Liga Galega de Traiñeiras – Trofeo Xunta de Galicia tiveron xornada este sábado. A Liga A e a Feminina desprazáronse ata Mugardos, mentres que a Liga B completou o seu calendario en Muros.
Como se se tratase dun guión escrito para as dúas bandeiras disputadas en Mugardos, a regata deparou un final similar nas vitorias de ambas ligas.
Na Feminina LGT o CR Cabo da Cruz gañou tras remontar a unha CR Chapela – Wofco que foi superada no último longo polas locais de Mugardos – A Cabana Ferrol, que conseguiron como locais o seu mellor posto da temporada.
Na Liga A, o final foi practicamente idéntico: Bueu-Teccarsa gañou a bandeira tras superar a Samertolameu Oversea, que finalmente foi adiantada por Tirán – Pereira.
O CR Cabo da Cruz, a un paso de asegurarse o título
Os resultados deixan a CR Cabo da Cruz e a Bueu-Teccarsa a 4 e 5 puntos, respectivamente, dos seus perseguidores. Tendo en conta que quedan dúas regatas, ambas traiñeiras acarician os títulos das súas respectivas liga.
⏱🏳🚣🏼TEMPOS e CLASIFICACIÓN da
IV BANDEIRA FEMININA REGANOSA
Parabéns Club Remo Cabo da Cruz#LigaF#LGT22#trofeoxuntadegalicia22#NON
💻📸 Difusion ProSport pic.twitter.com/lAtZY1TfwF— LigaLGT (@Ligalgt) August 20, 2022
No caso concreto da IV Bandeira Feminina Reganosa, Tirán – Pereira foi cuarta, Rianxo quinta, Castropol sexta, Salgado – Perillo sétima, oitava Riveira e novena Puebla. Cos resultados acadados, Mugardos – A Cabana Ferrol ascende ao terceiro posto da xeral e Castropol ao sexto, en detrimento de Tirán – Pereira e Riveira, respectivamente.
Na VI Bandeira Concello de Mugardos, o cuarto clasificado foi Rianxo que gañou a quenda tras unha batalla moi igualada coa filial de CR Cabo da Cruz. Sexta rematou CR Chapela – Wofco, que quedou lonxe dos rivais da manga de honra e superou por un segundo a Mecos, terceira na segunda quenda.
A oitava praza correspondeu a Cesantes Rodavigo, que gañou a primeira serie superando a Narón, Mugardos e Puebla. Os de Redondela e os de Narón quedaron por diante tamén de Mera, que rematou cuarta na segunda quenda.
O resultado deixa a Cesantes-Rodavigo moi preto da salvación tras superar por catro puntos a Puebla, pasando de estar un por debaixo a tres por riba cando só queda unha regata que reparte puntos para a loita pola salvación.
Liga B traiñeiras
Na última cita do calendario da Liga B, Castropol puxo a guinda a súa impecable temporada. O conxunto asturiano conseguiu en Muros a sétima bandeira deste curso, noutras tantas regatas disputadas. A Ría del Eo, que xa selara o título de forma matemática na anterior xornada, venceu con claridade por diante de Samertolameu-Oversea B e de Amegrove, as dúas traiñeiras que a vindeira fin de semana disputarán o play-off na Coruña.
A VI Bandeira Muros de San Pedro celebrouse a seis longos e na primeira das dúas quendas dominou dende o inicio Vila de Cangas. Por detrás da Balea estableceuse un duelo entre Salgado – Perillo e o conxunto local, dúas traiñeiras que alcanzaron igualadas o ecuador da regata. De desnivelar a balanza encargouse Muros no cuarto parcial e o equipo que remaba na casa foi quen de manterse por diante da embarcación de Oleiros ata o final.
O interese de cara á clasificación xeral na quenda de honra tiña como protagonistas a Amegrove e Cedeira, que chegaban separadas por dous puntos na pugna por obter o segundo billete para o play-off. A Pabliño defendeu con éxito a súa posición nunha regata na que na segunda e na terceira virada marcou peor tempo que Vila de Cangas.
Os de Porto Meloxo acabaron facéndose coa terceira praza, mentres que A Candieira non puido co rexistro da Balea e clasificouse quinta. Por diante delas, Castropol rachou a regata dende o primeiro longo e impúxose por 26” de vantaxe respecto a Samertolameu-Oversea B, segunda ao remate de todos os parciais.