Este sábado, 12 de decembro, ás 19:00 horas, finaliza a primeira volta da Primeira División de Fútbol Sala para o Pescados Rubén Burela. As laranxas ocupan a terceira posición, con cero derrotas, unha boa marca que queren manter ante o inesperado líder do Grupo B, o Torreblanca Melilla CF.
Con seis partidos disputados e 16 puntos, como o segundo clasificado, o Alcorcón, chegan as Guerreiras Laranxas. O cadro dirixido por Julio Delgado e Lucas atópase a só un punto do actual líder e próximo rival que, ademais, conta cun partido máis disputado.
Unha oportunidade de ouro para subir á primeira posición
O obxectivo das galegas segue pasando por levarse o título da competición e, para conseguilo, deben vencer a este rival directo, que se está facendo forte na categoría.
“Ven de grandes encontros, están facendo un gran traballo. Será moi complicado; iso din os números”, reflexiona a futbolista da Mariña, Cami. O Melilla está a ser o equipo revelación da categoría. Recentemente ascendido, o cadro local só se dobregou ante o Móstoles e o Alcorcón, cos que empatou a goles.
“É un plantel repleto de xogadoras brasileñas, co míster tamén brasileñoe unha estratexia de xogo libre. Sabemos que será duro”, advirte a laranxa, tamén natural de Brasil.
Cami: “Sabemos que é un partido moi importante, só pensamos nel. A próxima semana xa poderemos centrarnos na Copa”
Este encontro chega tras un moi bo partido do Burela, que ven de golear 9-1 ao Xaloc e antes do final four da Copa da Raíña. Sobre esta última vitoria, a peche do cadro galego recorda que “foi un bo partido, aproveitamos as oportunidades e sairon os goles. Estamos ben preparadas, estamos xogando ben, en plena evolución e crecendo. Queremos seguir así. Sabemos que é un partido moi importante, só pensamos nel. A próxima semana xa poderemos centrarnos na Copa”, sinala.
Este esperado duelo, entre dous conxuntos que sen dúbida exhibirán o seu bo fútbol, poderá seguirse a través da canle de Youtube do Melilla.
As convocadas do Burela
- 1. Jozi Oliveira
- 2. Dany
- 4. Sandra Buzón
- 5. Cristina
- 6. Cilene
- 7. Peque
- 8. Cami
- 10. Lara Balseiro
- 14. Bea Mateos
- 17. Ale de Paz
- 19. Elena Aragón
- 21. M. Cortés
Peque e Ale, convocadas con España
As xogadoras do Burela, Peque e Ale de Paz quedarán en Madrid na viaxe de volta da expedición laranxa a Galicia. Ambas futbolistas están convocadas coa Selección Española Absoluta, para disputar o amistoso ante a sub-21, o martes, 15 de decembro.
https://asnosas.gal/catro-xogadoras-galegas-convocadas-coa-seleccion/
