Invicto, pleno de vitorias e marcando moi de preto ao Futsi Atlético Navalcarnero, así avanza unha semana máis o Pescados Rubén Burela nesta Primera División do FutSalFem da RFEF. As da Mariña venceron e convenceron cun 4-1 ante a visita á Vista Alegre do Arriva AD Alcorcón que cae á décima praza na clasificación.
O Pavillón Vista Alegre de Burela acolleu o encontro entre o Pescados Rubén Burela FS e o Arriva AD. Alcorcón FSF. O partido tivo un comezo de xogo do máis rompedor. O conxunto visitante, o Arriva AD. Alcorcón recuperáballe o saque inicial ao Pescados Rubén Burela FS nos primeiros segundos do encontro e anotaba o seu primeiro tanto, creando unha tensión palpable durante todo o primeiro tempo.
Co tempo, todo quedaría en nada. Ese foi o único e solitario gol das madrileñas que remataba por perder en terras galegas.
A pesar do susto, as xogadoras laranxas souberon adaptarse á situación, coa calma e madurez que as caracteriza, e revertir o marcador no minuto 4 cun gol de Peque e inmediatamente despois, no minuto 5, adiantándose con outro gol de Emilly Marcondes que sella o resultado en 2-1 ata o descanso.
O Burela gaña distancias na segunda metade
Na segunda parte mantense a tensión durante os primeros case 10 minutos e no minuto 29 Peque anota o seu segundo tanto do día poñendo o marcador 3-1 e obrigando ao equipo rival a readaptarse á presión exercida polas lucenses.
Xa no minuto 37 Emilly Marcondes sentencia o partido co seu tamén segundo tanto do día, anotando o 4º gol (4-1) que será o último do encontro.
Cabe destacar o bo xogo de Estela García do Arriva AD Alcorcón FSF, incansable durante todo o partido en terras da Mariña.
Aínda que a superioridade do Pescados Rubén Burela FS se veu reflectida durante todo o xogo, ambos equipos estiveron moi acertados, serios e mostraron a súa ambición por conseguir os 3 puntos en xogo neste partido da oitava xornada.
A superioridade do bloque adestrado por Julio Delgado fixo que o marcador se decantase para as galegas que fixeron valer a súa calidade e non perden o paso dun Futsi Atlético Navalcarnero que tampouco fallou esta semana. As madrileñas vencían 7-1 ao MSC Torreblanca.
FICHA TÉCNICA
4) PESCADOS RUBÉN BURELA FS: Jozi, Cilene, Peque, Irene Samper e Antía – quinteto inicial -. Tamén xogaron: Dany, Claudia, Jenny, Emilly, Patricia e Caridad.
1) ARRIVA AD ALCORCÓN: Aida de Miguel, Tania Benito, Laura Sánchez, Claudia López e Estela García – quinteto inicial -. Tamén xogaron: Iraia Arbeloa, Paula Llorente, Laura Oliva, Patricia Arruti, Nerea Moldes, Alba Fernández, Marta Nuño e Carmen Alonso.
GOLES: Min.1 Laura Sánchez 0-1; Min.4 Peque 1-1; Min.5 Emilly 2-1; Min.29 Peque 3-1; Min.37 Emilly 4-1.
EQUIPO ARBITRAL: Borja Darriba Villamor, Daniel López López, Álvaro Darriba Rivas, Arcilio Dos Santos Mon. Carmen Alonso Pérez foi expulsada por dobre amonestación no minuto 35.
INCIDENCIAS: Partido disputado no Pavillón de Vista Alegre en Burela correspondente á oitava xornada da Primera División do fútbol sala feminino da Real Federación Española de Fútbol (RFEF).
Julio Delgado: “Marcho moi contento por que rendimos a un gran nivel e o equipo está cada vez áis maduro”
O adestrador do Pescados Rubén Burela, Julio Delgado, destacaba que o triunfo ante o Arriva AD Alcorcón foi “unha vitoria moi traballada. A primeira parte foi moi boa. Fomos quen de sobre poñernos ao gol con moita tranquilidade. A finalización acábanos matando, pero saímos gañando en todos os rexistros (defensa, ataque) e era cuestión de tempo que viesemos portería”.
“Marcho moi contento por que renderon a un gran nivel”, explicaba en rolda de prensa o técnico Julio Delgado. “Fixemos catro goles pero a nivel defensivo concedemos moi pouquiño e iso é importante xa que xera confianza nas xogadoras á hora de ter o balón”, argumentaba na súa análise do partido.
A satisfacción reflectíase na faciana do técnico ao final do partido e afirmaba que ía “contento por que vexo ao equipo cada vez máis maduro. Sábese manexar en calquera rexistro. Isto segue, segue, segue, imos sumando de tres en tres, e sobre todo facendo bo fútbol sala Hai xente nova que leva aquí meses ou un ano e cada vez van achegando máis e fan ao equipo moito máis compacto”.
