O Burela rescata un punto ante o Roldán

O Pescados Rubén Burela FS rescatou un empate (2-2) no Gabriel Pérez ante un Roldán que fixo valer o factor cancha e puxo as cousas moi complicadas ás mariñás. A lucenses regresan da xornada 22 co primeiro empate a domicilio da tempada tras remar contra a vantaxe do 1-0 nas proximidades do descanso e remontaron o 2-0 nos últimos catro minutos de xogo avaladas polo xogo de cinco, liderado pola maxia de Cilene.

As pupilas de Julio Delgado, que non puideron contar con Lara por enfermidade e con Jenny Lores retirada na primeira rotación por un golpe no xeonllo, dominaron o encontro e xeraron ocasións pero sen éxito sobre a rede custodiada por Ana Etayo. Cilene, Jenny e Ale de Paz dispuxeron das máis claras pero foron as locais as que aproveitaron para marchar ao descanso con vantaxe grazas ao dobre penalti, no minuto 18, transformado por Andrea Marín.

cilene nun partido burela - poio — Cilene co Pescados Rubén Burela | PRB

Etayo foi un muro

Definitivamente Ana Etayo tiña hoxe un imán fronte ás acometidas mariñás, con Ale de Paz como unha das máis activas. Con máis de oito minutos por diante e sen poder mover o marcador, as Guerreiras apostaron por xogo de cinco con Cilene como baluarte.

Con todo, foi o Roldán o que atopou de novo o premio, a porta baleira, de Bet Carrasco, ao cazar un erro de circulación laranxa. Cumpríase o 34 de xogo. Non cesou na súa insistencia o Pescados Rubén. Etayo evitou o remate de cabeza de Peque e Jenny tivo outra de ouro. Parecía que non entraba nada pero, por fin, a portuguesa puido reducir no 36, a pase de Ale de Paz, tras un brillante regate de Cilene.

Etayo evitou o empate das galegas ante un gran lanzamento de Peque e aínda quedaba 1’31” por diante. Volveu sacar un pé provindencial a meta local para frear a Dany, pero nada puido facer a balón parado, con 42 segundos aínda en xogo, coa sempre máxica Cilene. Dispuxo o Burela do que podería ser o gol da vitoria a 9 para a bocina final, con todo, aí estaba a protagonista do partido.