O Pescados Rubén Burela remata a segunda fase en segunda posición, tras caer derrotado no Clásico ante o Futsi Atlético Navalcarnero por un 2-1. As Guerreiras Laranxas disputarán o play-off polo título tras non poder coas líderes da Primera División.
As mariñás viaxaban coa ausencia de Peque por motivos médicos e con Dany e Cami obrigadas a retirarse durante o encontro. Porén, as futbolistas responderon ben na loita pola primeira posición nun duelo moi rifado e esixente, que tiveron que disputar soportando as altas temperaturas madrileñas.
O Clásico en terras madrileñas
As locais, con máis perigo nos primeiros minutos, adiantáronse con 42 segundos no ecuador do primeiro acto, grazas a un rexeitamento que aproveitou Lora tras o pase de tacón de Leti.
O Burela notaba xa a baixa de Dani na primeira rotación, tras recibir un duro golpe. Elena Aragón animaba ás filas galegas cun disparo que porén foi demasiado cruzado. O gol laranxa chegaría no minuto 13, da man de Lara Balseiro, quen foi quen de poñer as táboas no marcador, aproveitando a portería baleira.
Na segunda parte o equipo de Julio Delgado volveu a perder a unha xogadora, coa marcha de Cami sen poder apoiar a perna esquerda por un duro golpe na tibia.
O partido continuou con opcións en ambos bandos da pista, pero cun Futsi que logrou adiantarse con Ame Romero no minuto 24, grazas á recuperación de Ari.
Co marcador en contra, o conxunto galego puxo todo na pista por rascar un punto ante as madrileñas. As ocasións burelistas aumentaban co paso dos minutos, pero o segundo gol non chegaba. Jane non puido sentenciar nunha gran diagonal no minuto 26 e a ocasión de Ale de Paz uns minutos despois acabou nas mans da cancerbeira rival.
Tras a gran resposta de Sandra Buzón no minuto 35, para salvar o terceiro fronte a Irene Córdoba, o Burela tampouco tivo do seu lado a sorte necesaria para puntuar no dobre penalti de Jane e con rexeitamento de Leti.
Aínda quedaban tres minutos para o pitido final e as Guerreiras Laranxas non se viron abaixo. A conexión en recuperación entre a 11 e a 21 volveu a rozar o empate na seguinte xogada. Por outra parte, Leti e Ari non puideron gañarle a partida a Sandra Buzón, polo que a emoción era máxima no tramo final.
O Clásico rematou cun gran disparo de Luísa Mayara encadeándose coa transición de Anita Luján, que salvou Jane xa baixo paus.
Podes revivir o encontro ao completo dándolle ao play:
O Burela, único galego no play-off
Co Futsi Atlético como líder, tres equipos máis pasan ao play-off de loita polo título. As laranxas do Pescados Rubén Burela son as únicas galegas que estarán nesta fase final da competición. Tamén competirán o STV Roldán FS, que remata na terceira praza tras unha goleada ao Móstoles, e o AD Alcorcón, que finaliza cuarto, arrebatándolle o billete ao conxunto galego do Poio Pescamar.
FICHA TÉCNICA
FUTSI ATLÉTICO NAVALCARNERO: Belén de Uña, Ari, Ame Romero, Anita Luján e María Sanz – quinteto inicial-. Tamén xogaron: Ju Delgado, Leti, Lora, Irene Córdoba, Becha, Marta Balbuena e Laura Córdoba.
PESCADOS RUBÉN BURELA: Jozi Oliveira, Dany, Cami, Lara Balseiro e Luísa Mayara – quinteto inicial-. Tamén xogaron Bea Mateos, Jane, M. Cortés, Ale de Paz, Elena Aragón e Sandra Buzón.
GOLES: 1-0, minuto 10, Lora; 1-1, minuto 13, Lara Balseiro; 2-1, minuto 24, Ame Romero.
ARBITRAXE: Carrión Álvarez // Cazorla Pérez. Por Futsi amarela a Lora (minuto 11), Ame Romero (minuto 34), Ari (minuto 35). Por Burela amarela para Jane (minuto 7), Luísa Mayara (minuto 20), Leti (minuto 36)
INCIDENCIAS: Partido correspondente á xornada oitava da segunda fase de competición na Primera División Femenina de fútbol sala da RFEF disputado na Estación de Navalcarnero (Madrid).
