O Pescados Rubén Burela FS desbancou o Futsi Atlético Navalcarnero ao que venceu por un marcador de 0-1, nunha semifinal con sabor a título. Trátase de dous equipos considerados do mellor da categoría. Galegas e madrileñas oferceron sobre a cancha en Las Rozas, nunha cita moi igualada, chea de detalles, de alternativas e alternancias.
Un gol de Ale de Paz, no rexeite dunha falta, foi o salvoconduto que lles proporciona ás da Mariña o billete cara a unha nova final. As futbolistas do Pescados Rubén Burela demostraron o seu xen competitivo e que como grupo as batallas tamén se gañan sabendo sufrir.
Con esta vitoria, as Guerreiras Laranxas pelexarán polo seu terceiro título consecutivo de Copa da Raíña. O farán fronte ao Torreblanca Melilla, que superou a Universidad de Alicante (2-7) no partido que inauguraba a tarde. A gran final do fútbol sala feminino español decidirase mañá, domingo 2 de maio, ás 19.00 horas. O cruce será emitido en directo pola canle Teledeporte.
Un duelo de titáns
A segunda semifinal de Las Rozas demostrou sobre a pista o gran duelo de titáns de dous conxuntos que se coñecen moi ben, cunha primeira parte moi equilibrada con máis dominio das madrileñas. O Pescados Rubén Burela FS aplicouse en defensa fronte á presión de Futsi Atlético Navalcarnero, que non deixou de entorpecer a conexión das mariñás con Dany liderando a súa lista de prioridades.
Peque avisou no primeiro minuto á contra e contestaron as madrileñas, con máis posesión no tramo inicial, tamén en recuperación con Ju Delgado e Ari.
Superado o ecuador do primeiro acto, ambas as redes protatonizaron alternancia de perigo; tras o centro de Luísa Mayara ao que non puido chegar por moi pouco Ale de Paz, Ju Delgado rozou o traveseiro de Jozi Oliveira. Dany, nun pase longo, e Ale de Paz, en rexeite desde estratexia, protagonizaron as mellores galegas antes do descanso. As xogadas ocorreron nos minutos 17 e 18.
Finalmente, foi Ale de Paz quen inaugurou o luminoso no minuto 25, cazando o rexeite da súa propia tentativa en falta. A fútbolista de Neda tivera outra de ouro segundos antes nun pase de tacón de Peque nun regreso á pista en que avisaran tamén o pase de Leti a Ame Romero, que non conseguiu rematar de cabeza, e Anita Luján, coa intervención a 17 laranxa en última instancia.
Nunha segunda parte co Pescados Rubén Burela FS dando un paso adiante creando e xerando, o equipo galego sumou a quinta falta con case 10 minutos por diante e Futsi Atlético Navalcarnero fixo o propio con 8, pero a intensidade non diminuíu.
Non deixou de buscar o segundo o conxunto de Lucas, cun gran remate de Peque e Dany rozando o pau. Jozi Oliveira, no 35, mantivo a vantaxe das Guerreiras no dobre penalti de Ari. Foi o momento de Futsi Atlético Navalcarnero para apostar por xogo de cinco con Anita Luján. As mariñás non puideron aproveitar dúas a porta baleira, de Ale e Peque, nin o dobre penalti da de Neda para clasificarse cun marcador máis cómodo.
FICHA TÉCNICA
FUTSI ATLÉTICO NAVALCARNERO: Belén, Ari, Leti, Ju Delgado e Ame Romero – quinteto inicial -. Tamén xogaron: María Sanz, Anita Luján, Irene, Becha, Lora e Marta Balbuena.
PESCADOS RUBÉN BURELA FS: Jozi Oliveira, Dany, Peque, Cami e Ale de Paz – quinteto inicial -. Tamén xogaron: M. Cortés, Bea Mateos, Jane e Luísa Mayara.
GOLES: 0-1, minuto 25, Ale de Paz.
ÁRBITROS: Diego Martínez // Antonio Navarro // Sara Gutiérrez. Amonestaron polo Futsi Atlético Navalcarnero con cartón amarelo a Becha (minuto 13), Lora (minuto 31) e tamén a Ari (minuto 32). Polo Pescados Rubén Burela viu cartón amarelo a futbolista Bea Mateos (minuto 29).
INCIDENCIAS: Segunda semifinal da Copa de S.M. A Raíña disputada en Las Rozas. Partido emitido en directo pola canle Teledeporte.
