Burela FS TV vestirá as súas mellores galas nun programa especial previo para a final four de Málaga (18-20 de decembro), este xoves ás 19.00 horas en directo. Ao longo dunha hora, a canle laranxa abordará os detalles desta segunda edición da Copa da Raíña, co título defendido polas Guerreiras, a través dun faladoiro virtual.
A xornalista deportiva Neus Pachón, a exjugadora e actual segunda adestradora do Ourense Envialia Bea Seijas e o responsable da conta de Twitter Zona Futsal José Antonio Vale, co colaborador burelista Joaquín Vázquez como moderador, porán sobre a mesa a súa opinión sobre o evento e os candidatos ao título da segunda edición da Copa da Raíña, facendo un repaso ademais sobre a historia da competición, e da final four de Copa do Rei.
Julio Delgado tamén falará das súas impresións sobre o regreso ao Martín Carpena tras o título de liga conquistado no pasado mes de xuño polas Guerreiras Laranxas. Tamén trasladará o adestrador burelista o seu pensamento sobre ADA Alcorcón como rival de semifinais, pero tamén de Poio Pescamar e Univesidad de Alacante.
Como non podería ser doutra forma, tamén haberá tempo para lembrar os mellores momentos da primeira edición copeira, Burela 2019, co gran estalido final da Bancada Laranxa e das nosas Guerreiras como campioas.
