Un caso moi particular neste boom das transmisións de deportes a través de entornos dixitais, que se deu neste excepcional 2020 incentivado pola redución de aforos e peches de canchas ao público por mor da COVID-19, foi o do Pescados Rubén Burela. As da Mariña non eran novatas no mundo do streaming pero esta tempada decidiron facer unha gran aposta forte por mellorar nesta área.
O pasado mes de novembro lanzaron Burela FS TV, unha web que, ademais de retransmitir en vivo os partidos das Guerreiras Laranxas a xeito de streaming, tamén emite especiais sobre o futsal e entrevistas, previas dos partidos, debates. Unha canle enteira pensada para a afección laranxa e as fans do futsal.
Antes emitían os partidos femininos mediante dunha colaboración coa Deputación de Lugo pero, a raíz dos conflitos polos dereitos da competición masculina coa Liga de Fútbol Profesional, decidiron dar o paso de crear Burela FS TV para a emisión en streaming de contidos.
Na categoría feminina o futsal non ten ningún tipo de impedimento para emitir os partidos e a propia Federación negociou para que a Copa da Raíña e a Supercopa se emitisen en Teledeporte. “Creou novas axudas para o fútbol sala feminino e non pon ningún impedimento en que deamos visibilidade polos medios que consideremos”, declaran desde o Burela.
Igualdade nos equipos masculino e feminino na emisión en streaming
Con esta nova plataforma, queren aportar o seu gran de area á visibilización do deporte feminino. “Se teño un despliegue para o masculino, teño o mesmo para o feminino”, recalcan, coa intención de que “a igualdade non sexan só palabras ocas”.
Ademais, esta era unha iniciativa que xa tiñan en mente e a situación da pandemia acelerou. Agora, as laranxas xa pensan en dar un paso máis e están traballando na creación dunha APP dentro do proceso de dixitalización do club.
O streaming abre as portas do deporte feminino galego a todo o mundo
Federación Galega de Atletismo: “Cumprimos cun servizo público”
