- As mariñás do Burela FS lograron igualar un 0-4 no segundo tempo, pero non foron capaces de remachar a remontada diante do Futsi Atlético Navalcarnero polo que non estarán na final da Liga Iberdrola FS 2024-25.
O Burela FS despediu a tempada cunha derrota no terceiro partido da semifinal da liga Iberdrola FS diante do Futsi Atlético Navalcarnero (4-4 no tempo regulamentario e 6-7 nos penaltis), nun encontro cargado de tensión, que foi unha auténtica tolemia durante a segunda parte e que se tivo que decidir desde o punto de penalti.
O Futsi Atlético Navalcarnero foi superior no primeiro tempo e froito deste dominio foise ao descanso cunha gran renda de tres goles, que elevou a catro no minuto 25. Cando peor estaban as cousas apareceu a garra das Pícaras que, aínda sen a participación de Emilly, foron capaces de igualar o electrónico antes do final facéndolle moito dano ás branquivermellas co xogo de cinco.
O encontro comezou cuns minutos de tanteo nos que ningún equipo era capaz de xerar ocasións de perigo sobre o marco rival. Con todo, as atléticas lograban adiantarse no 4 grazas a unha falta perigosa na frontal da área burelesa que executaba Ari e batía á cancerbeira local Caridad. Tivo opción ao empate rápido o conxunto local, nun remate de cabeza ao pau de Patricia á saída dun córner.
Xusto antes do ecuador chegaba o segundo das visitantes, nunha acción na que o balón lle chegaba en liña de fondo a Irene Córdoba. Esta metía un centro ao corazón da área e Cilene, vindo desde atrás, tocaba o coiro e batía á súa propia compañeira.
Este segundo tanto foi un mazazo para as mariñás, que se repuxeron cunha dobre ocasión no minuto 13, xusto despois de que Futsi Atlético Navalcarnero cometese a súa quinta falta cando aínda restaban 7 minutos e medio para o descanso. Nesa dobre ocasión, primeiro remataba Patricia e o rexeite tras o despexe de Marta Balbuena caíalle a Antía Pérez, que se volvía a atopar coa meta madrileña. Nese mesmo minuto terían o primeiro de novo as futbolistas que adestra o técnico Julio Delgado, a través dun dobre penalti executado por Antía Pérez. O seu lanzamento íase demasiado alto.
Nos últimos cinco minutos do primeiro período producíanse moitas ocasións para ambos equipos. Leti, soa ante Caridad tras recortar a Cilene, remataba ao corpo da porteira de Sanlúcar; despois era Marta Balbuena a que aparecía para sacar unha grandísima man abaixo diante dun lanzamento peligrosísimo de Antía Pérez; posteriormente Marian atopábase co pau nun disparo desde a frontal e no 17 chegaba o 0-3.
Laura Córdoba subía un balón, ninguén lle saía ao paso e acababa soltando un lanzamento que non podía deter Caridad. No último minuto aparecía Cilene coa camiseta de porteira e na primeira acción de xogo de cinco tiña o 1-3 Patricia, pero o seu remate no corazón da área era repelido por Marta Balbuena.
O descanso non lle serviu ás laranxas para reaccionar, que vían como rozaban o cuarto as atléticas nun disparo demasiado cruzado de Laura Córdoba ante Ana Eliza, que defendía no segundo tempo o marco local. Non perdoaría na seguinte a madrileña, que quedaba soa de novo diante da meta brasileira tras un gran balón ás costas da defensa mariñá da súa irmá xemelga.
O 0-4 e un tanto rápido de Patricia xogando de cinco espoleou ás futbolistas do Burela FS , que empezaron a dominar o partido ante un Futsi Atlético Navalcarnero que caía na trampa da tolemia mariñá. De novo Patricia tiña o segundo no 27, pero o seu remate no segundo pau atopábase coa madeira e o 28 era Dinha a que si superaba a Marta Balbuena cun lanzamento rápido tras recibir o balón na área. Vista Alegre e o cadro local entraban en ebulición e obrigaban a Joan Linares a solicitar un tempo morto para acougar as augas.
Conseguiuno en primeira instancia, xa que imposibilitou durante varios minutos que as locais volvesen armar o xogo de cinco e mesmo anotou un gol Futsi Atlético Navalcarnero, pero que foi anulado por falta a Ana Eliza. Ademais, Cami tiña que sacar baixo paus un remate de Leti cando non había porteira no marco laranxa. E no 29, entre Ana Eliza e o pau, evitaban que se fose para dentro un tiro de Irene Córdoba desde unha posición escorada.
Tolemia en Vista Alegre
A quinta falta de Futsi Atlético Navalcarnero, cando aínda restaban 11 minutos e medio por disputarse, cambiou de novo o decorado e envorcou o campo cara á portería atlética. Pronto tería o cadro local unha dobre oportunidade para marcar desde os 10 metros, pero Antía Pérez volvía desaproveitala en primeira instancia. Nesta ocasión era Marta Balbuena a que interviña para evitar o gol local. No mesmo minuto tentábao Dinha, pero o seu doblepenalti perdíase por encima do traveseiro. Era o terceiro que malograban as locais.
A pesar de non aproveitar estas dúas ocasións, o conxunto da Mariña seguíu tentándoo e no minuto 36 atopaba o premio ao seu esforzo cun zurdazo de Cami que entraba pegado ao traveseiro. O Futsi Atlético Navalcarnero sufría para defender o xogo de cinco e pouco despois chegaba o empate nunha gran xogada de todo o cadro laranxa que remachaba dentro da área Patricia.
Con pouco máis de dous minutos de tempo regulamentario por xogarse comezaba un novo partido, aínda que o técnico do Burela FS, Julio Delgado, retiraba a súa aposta polo xogo de cinco e non se producirían máis accións de perigo para ningún dos dous contendentes.
O primeiro tempo da prórroga contou con tres boas ocasións para as locais e unha para as visitantes. Marta Balbuena volveu aparecer para despexar un disparo de Patricia desde o á dereita e metía despois unha gran man nun disparo de Dinha ao primeiro pau. Entremedias, Laura Córdoba puido poñer por diante ao seu equipo, pero o seu disparo cruzado foise rozando o pau da portería mariñá.
E xa sobre o final, de novo Patricia virábase moi ben no pívot, pero o seu lanzamento á media volta era repelido por Marta Balbuena. O segundo tempo extra contaría con menos ocasións, sendo a máis destacada un remate de Irene Córdoba que tocaba o xusto Ana Eliza para envialo á cruceta e que finalmente saíse a córner.
O billete á final decidiuse nos penalties
O pase decidiríase desde o punto de penalti e o Burela FS tivo dous balóns para selar o seu acceso á final, pero non os aproveitaron Cilene e Carolina Pedreira. A quenda empezou con boas noticias para as Pícaras, xa que Caridad detíñalle o primeiro penalti á fútbolista visitante Irene Córdoba.
Despois anotarían Antía Pérez, Patri, Dinha, Laura Córdoba, Noelia Montoro, María Moreno, Patricia, Ari e, co pase no peto, Cilene fallaba o quinto. Leti anotaba o quinto do seu equipo, Emilly igualaba, Ana Eliza detiña o penalti de Anita Luján e Carolina Pedreira desaproveitaba a oportunidade ante Bea Parrón de certificar a clasificación.
A meta branquivermella, coas súas tres paradas nos penaltis, acabaría sendo a heroína de Futsi Atlético Navalcarnero. Leninha facía o sexto da quenda para as visitantes, Débora igualaba, Marian anotaba o sétimo e Bea Parrón paraba o lanzamento de Cris Lourés e dáballe o pase á final ao Futsi Atlético Navalcarnero.
FICHA TÉCNICA
4) BURELA FS: Caridad; Cami, Patricia, Antía Pérez, Dany – quinteto inicial -, Noelia Montoro, Dinha, Débora, Carolina Pedreira, Cilene, Ana Eliza (p.s.), Cris Lourés e Emilly.
4) FUTSI ATLÉTICO NAVALCARNERO: Marta Balbuena; Laura Córdoba, Anita Luján, Leti, Irene Córdoba – quinteto inicial -, Marian, Ari, Patri, Leninha, María Moreno e Bea Parrón (p.s.).
GOLES: 0-1, min. 4: Ari. 0-2, min. 9: Cilene (pp). 0-3, min. 17: Laura Córdoba. 0-4, min. 25: Laura Córdoba. 1-4, min. 25: Patricia. 2-4, min. 28: Dinha. 3-4, min. 36: Cami. 4-4, min. 38: Patricia.
PENALTIES (6-7): Irene Córdoba (erro), Antía Pérez (gol), Patri (gol), Dinha (gol), Laura Córdoba (gol), Noelia Montoro (gol), María Moreno (gol), Patricia (gol), Ari (gol), Cilene (erro), Leti (gol), Emilly (gol), Anita Luján (erro), Carolina Pedreira (erro), Leninha (gol), Débora (gol), Marian (gol), Cris Lourés (erro).
EQUIPO ARBITRAL: Fernando Faubell e Lucía Guillén (Colexio de Aragón). Amonestaron á xogadora local Antía Pérez e ao seu técnico, Julio Delgado. Así mesmo, viron a cartulina amarela as futbolistas do equipo visitante Marian e Ari.
INCIDENCIAS: Terceiro partido da semifinal do play-off polo título da Liga Iberdrola FS 2024-25 disputado no pavillón de Vista Alegre diante duns 800 espectadores. No palco, estivo a seleccionadora española de fútbol sala Clàudia Pons.
