Cómoda vitoria do Pescados Rubén Burela por 6-0 ante o AE Penya Esplugues que visitou Vista Alegre moi minguado polas baixas aínda que defendeu con orgullo o seu escudo. O conxunto burelista recupera a senda do triunfo cunha boa primeira parte na que deixou encarrilado o partido e festexa cun triunfo na casa a consecución da súa cuarta Supercopa de España.
A escuadra mariñá iniciou o encontro moi enchufado e nos primeiros compases xa gozou dunha clara ocasión de Peque para inaugurar o marcador. Tras este primeiro aviso o Pescados Rubén Burela tomou o control do xogo ante a resistencia visitante que liquidou Ale de Paz cun gran disparo desde a frontal no minuto 2.
O Pescados Rubén Burela exerceu un dominio absoluto do xogo e tras varias ocasións erradas ampliou a súa renda no minuto 9. Tras unha bonita acción colectiva Bea Mateos foi a encargada de marcar o 2-0 culminando a xogada no segundo pau. O AE Penya Esplugues reaccionou con varios intentos sobre a meta defendida por Sandra Buzón pero pagou caro o seu atrevemento co momento de inspiración de Irene Samper. A xogadora laranxa asestou un dobre golpe ao conxunto catalán marcando o 3-0 nunha contra fulgurante e o 4-0 noutra xogada colectiva finalizada ao segundo pau.
Con este marcador chegouse ao descanso e na continuación o Pescados Rubén Burela baixou un pouco o ritmo da primeira parte ante un AE Penya Esplugues que seguía buscando as súas opcións nalgún contragolpe, Sandra Buzón desbaratou as escasas ocasións visitantes.
No minuto 26 Emilly logrou marcar o 5-0 cun potente disparo desde a frontal e na recta final Elena Aragón completou o set das Guerreiras Laranxas co 6-0 final.
Final del partido en Burela .@burelafs 6️⃣ @PenyaEsplugues 0️⃣@live_vuvuzela @esimportante_es @SoloFutSal_ @FutbolCatala2 @esportsenxarxa pic.twitter.com/OxHST88L3y
— AE Penya Esplugues (@PenyaEsplugues) March 5, 2022
O Burela, segundo
Con este resultado as da Mariña mantéñense fortes na segunda praza con 13 puntos menos pero tamén tres partidos menos disputados que as líderes invictas do Futsi Atlético Navalcarnero. As madrileñas vencía 2-3 esta semana ao Universidad de Alicante superando os cen goles a favor na súa conta particular no que vai de tempada.
A vindeira fin de semana o Pescados Rubén Burela viaxará a terras mañas para enfrontarse ao Sala Zaragoza, que ten un pé nos postos de perigo.
Desde @PenyaEsplugues felicitar al @burelafs por el triunfo de hoy y esperemos con el deseo de volvernos haber la proxima temporada, felicidades por la victoria y por la #supercopafutsal lograda el fin de semana anterior .
— AE Penya Esplugues (@PenyaEsplugues) March 5, 2022
FICHA TÉCNICA:
6) PESCADOS RUBÉN BURELA: Sandra, Dany, Peque, Irene e Ale de Paz – quinteto inicial -. Tamén xogaron: Camila, Jenny, Lara Balseiro, Bea Mateos, Elena Aragón, Leti M.Cortés e Emilly.
0) AE PENYA ESPLUGUES: Laia Beltrán, Ruth Aurín, Martita, Celia Cata e Pilar Ribes – quinteto inicial -. Tamén xogaron: Clara Sitjas, Mireia Tremps e Aina Torrents.
GOLES: 1-0, m.2, Ale de Paz; 2-0, m.9, Bea Mateos; 3-0, m.13, Irene Samper; 4-0, m.13, Irene Samper; 5-0, m.26, Emilly; 6-0, m.36, Elena Aragón.
ÁRBITROS: colexiados Javier Menéndez Nistal e Héctor Vilas López
INCIDENCIAS: Partido correspondente á xornada 19 de Primeira División do fútbol sala feminino da RFEF, disputado no pavillón Vista Alegre de Burela. 300 espectadores. Antes do inicio do partido gardouse un minuto de silencio en memoria de Ana Nogueira, socia burelista. Houbo un corredor de honra realizado polas xogadoras o conxunto do AE Penya Espluges as deportistas do Pescados Rubén Burela FS polo seu título de Supercopa de España recentemente conquistado en Jérez de la Frontera. Todas as capitás dos equipos de Primeira División portaron nos seus brazos nesta xornada 19ª un brazalete coas cores da bandeira de Ucraína coa fin de pedir o fin da guerra.
