O Día das Letras Galegas, o 17 de maio, o futsal galego estará de celebración. Pescados Rubén Burela e Ourense Envialia cítanse en Narón, no pavillón da Gándara, para disputar a final da XIV Copa Galicia.
A loita polo título autonómico, enmarcada dentro da pasada tempada 2019/2020, non se puido celebrar ata esta nova data, debido aos aprazamentos pola pandemia. A competición está organizada pola RFGF (Futgal) en colabroación co Concello de Narón e os clubs Cidade de Narón e S.D.C. e R. Narón o Freixo.
Final de alto nivel entre o Burela e o Envialia
Esta cita acollerá a dous equipos de moi alto nivel. Ambos compiten na máxima categoría do fútbol sala feminino español e neste momento da tempada, xunto co Poio Pescamar, disputan a segunda fase ubicados no grupo que compite á procura do título.
Para chegar a esta final, o Ourense Envialia que adestra Gonzalo Iglesias, Morenín, tivo que superar ao subcampión de Copa e Supercopa, o Poio Pescamar, nas semifinais.
Polo que respecta ao Pescados Rubén Burela, estamos ante o vixente campión do título en xogo: a Copa Galicia. Pero tamén do Campionato de Liga, da Copa da Raíña e da Supercopa de ámbito estatal.
As Guerreiras Laranxas foron recoñecidas hai pouco como o mellor equipo de fútbol sala feminino do mundo nos FutsalPlanet Awards 2020, como bloque. Unha distinción de grupo á que sumaron neses premios a segunda praza de Mellor Adestrador Feminino optida por Julio Delgado e de Mellor Xogadora para Peque.
Outro dato para testar o nivel destes dos bloques que medirán forzas sobre a cancha para alzar a Copa de Galicia, é que se trata de dúas escuadras, Ourense Envialia e Burela, que van participar na fase final da Copa da Raíña neste presente curso. Esa competición de ámbito estatal terá lugar entre o 30 de abril e o 2 de maio.
Nesta final a celebrarse en Narón, o Pescados Rubén Burela actuará como local, ao ter pasado primeiro á final, tras vencer ao Viaxes Amarelle FSF. As Guerreiras Laranxas chegan despois dunha tempada case de 10, coroándose, como comentabamos previamente, como campioas de Copa da Raíña e Supercopa, só a falta de revalidar o seu título de campión de Liga deste ano. Un entorchado que aspiran a revalidar.
