O Pescados Rubén Burela FS acaba de detectar un caso positivo en COVID-19 entre as súas xogadoras, polo que o grupo dos seus contactos directos dentro do equipo deberá illarse seguindo os protocolos sanitarios. Desta forma, o club mariñán solicitou ao xuíz da competición o aprazamento do partido ante o Intersala.
O Burela leva desde a semana pasada sen adestrar. O pasado xoves, 14 de xaneiro, as futbolistas realizaron os test de antíxenos correspondentes e o club laranxa recibiu a confirmación dun positivo por PCR ao día seguinte, o venres 15. Ao coñecer a noticia, o equipo informou tanto ao Servizo Galego de Saúde como á Real Federación Española de Fútbol (RFEF).
Parte do Burela volve este mércores ao traballo
Unha vez cumprido o protocolo sanitario do corpo médico e dando negativo nos test, parte das xogadoras galegas volverán este mércores aos adestramentos.
A futbolista que deu positivo non ten síntomas, pero permanecerá en confinamento ata o final desta semana. Da mesma forma, a parte do grupo que tivo contacto directo tampouco reincorporarase ata pasados uns días.
A xornada 11 ante o Intersala, pendente do adiamento
Tras informar do positivo aos organismos correspondentes, tanto as galegas como o Intersala Zaragoza están pendentes de coñecer a resolución do xuíz da Primeira División de Fútbol Sala para saber se xogarán ou non a undécima xornada.
O duelo, que enfronta ás líderes da categoría coas penúltimas clasificadas, está previsto para este domingo, 24 de xaneiro, na pista das mañas.
El @burelafs de está inmerso en el protocolo de aislamiento tras un caso positivo #COVID19 entre sus jugadoras. El juez de competición resolverá el devenir de la jornada 11 @SalaInter este sábado.
➕: https://t.co/btjjfyow5U pic.twitter.com/GezfdNgGWC
— Pescados Rubén Burela FS (@burelafs) January 20, 2021
Así, o regreso das Guerreiras Laranxas á competición regular podería atrasarse máis do esperado. As galegas xa non puideron disputar a anterior xornada contra a AD Alcorcón por mor do temporal Filomena, e previsiblemente tampouco xogarán esta xornada.
As da Mariña son o segundo equipo galego da máxima categoría do futsal español que detecta positivos nas súas filas. Xa o fixo antes o Poio Pescamar, que tivo que adiar o seu partido ante o Leganés ao detectar tres casos no plantel.
