O futsal no Pescados Rubén Burela FS non para e, tras proclamarse como tricampioas cos títulos de Primeira División, Copa da Raíña e Supercopa, as laranxas volven á competición regular. A cita será este sábado, 16 de xaneiro, ás 18:30 horas ante a AD Alcorcón.
Este partido será unha proba para que as Guerreiras Laranxas manteñan o seu liderado. O equipo ás ordes de Julio Delgado ven de vencer ao Bodegas Sommos Intersala, pero deberá seguir sumando de tres en tres se quere manter a primeira posición.
Despois de sete vitorias e só un empate, sen derrotas, semella que as da Mariña están cómodas como líderes e non pensan baixar desta posición. Con 22 puntos, as laranxas aínda non atoparon un rival que as vencera.
Non o fixo o Alcorcón no partido de ida, no que perdeu por 2-3 ante as galegas. Sete partidos despois, as madrileñas ocupan a posición de bronce, con cinco vitorias, un empate e dúas derrotas no seu haber. A distancia respecto ás mariñás, de seis puntos, podería aumentar tras esta décima xornada.
Cilene, baixa importante entre as Guerreiras Laranxas
Para este partido Julio Delgado non poderá contar coa brasileira Cilene. A 6 das laranxas foi intervida do tendón de Aquiles este martes, tras quedar lesionada no partido de Supercopa ante o Poio Pescamar.
Duelo entre as mellores futbolistas
Quen si estarán na pista son Peque e o resto das súas compañeiras. A capitá ven ademais de ser nominada como unha das mellores xogadoras do mundo, así como o propio equipo, pola publicación Futsalplanet que outorga os premios Annual Futsal Awards.
No equipo contrario, tamén estará unha xogadora nominada. Trátase da galega Vane Sotelo, que competirá sobre a pista contra as da Mariña e na gala de premios contra Peque, optando ao mesmo galardón.
Sen dúbida, o nivel sobre a pista de Vista Alegre estará moi alto, entre dous dos mellores conxuntos do país e con futbolistas recoñecidas a nivel mundial. Un inicio da competición no 2021 que será unha celebración do futsal español e galego.
Jornada 1⃣0⃣ Primera #RFEF Femenina
⚽️ @burelafs @ADAlcorconFSF
Sábado 16 de enero
⏰ . horas
️ Vista Alegre
https://t.co/9YfA3QERYe#Burela #Futsal #SomosFutsal #FutsalHeart pic.twitter.com/CuJHaFV3Nd— Pescados Rubén Burela FS (@burelafs) January 13, 2021
Como ven sendo costume, o partido entre laranxas e madrileñas poderá seguirse a través da plataforma laranxa de streaming Burela FS TV.