Este ano a Primera División Femenina de Voleibol acolle a tres equipos galegos: o CV Bruxas, o Calasancias Coruña e o Aceites Abril CVO. Este último está facendo unha moi boa tempada que o mantén na segunda división, pero non é así para o Bruxas e o Calasancias.
As amienses levan seis puntos, con tres partidos xogados, con dúas vitorias de tres puntos e unha derrota 3-0. O Bruxas busca meterse entre as tres primeiras posicións, pero aínda está algo lonxe delas, concretamente a catro puntos do Curtidora Universidad Oviedo.
Con todo, as xogadoras non perden a esperanza e seguen loitando por aumentar a diferenza entre os sets que gañan e os que perden, que polo de agora é de seis fronte a tres. A derrota por 3-0 fronte ao Fertiberia Los Campos da xornada anterior foi a primeira que sufriron esta tempada. Algo que intentarán que non se repita no próximo partido no pavillón de Bertamiráns contra o Voleibol Astillero, o sábado ás 19:30 horas.
Pola súa banda, o Calasancias Coruña precisa puntuar nos seguintes encontros para fuxir dos últimos postos. Con cinco partidos xogados, as coruñesas soamente conseguiron puntuar nun, na quinta xornada, visitando ao D’Elhuyar cun 1-3.
As galegas tiveron que descansar na xornada anterior, así que tras esta pausa visitarán ao colista, o Universidad de Salamanca, coa intención de manter a boa racha iniciada en Logroño.
Moi distinta é a situación do Aceites Abril, que sufriu unha derrota contra o Universidad de Valladolid na sexta xornada, na que foi o seu primeiro partido perdido. As ourensás seguen de todas formas na segunda posición, a catro puntos do líder, o CV Oviedo.
