A competición aínda non rematou para o CV Bruxas. As galegas teñen pendente o partido ante o actual líder, o CV Oviedo, que recuperarán este mércores, 23 de decembro, ás 20:30 horas.
O duelo corresponde á oitava xornada da Primera División Femenina de voleibol e celebrarase en Ames, na pista do Bruxas. As xogadoras locais chegan despois dunha traballada vitoria ante o D’Elhuyar, colistas na clasificación.
Con cinco vitorias de tres puntos e tres derrotas (unha delas dun punto), o conxunto galego chega xusto na metade da táboa, na quinta posición, a falta de que se celebre este encontro. De gañar, ou perdendo dun punto, poderían superar a outro cadro galego, o Aceites Abril, que se atopa unha posición por enriba con 17 puntos.
O rival do Bruxas pola contra, chega invicto na primeira posición. Cun plantel moi xove (só unha xogadora de todo o plantel é sénior), o conxunto asturiano está a ser o mellor equipo da tempada.
O único rival que as freou momentáneamente foi o Curtidora Universidad Oviedo, nun derbi moi disputado e que se decantou polo CV Oviedo no tie break.
Unha vitoria podería ser un xute de enerxía e motivación para as de Ames. Con tres puntos máis achegaríanse ao podio e terían máis posibilidades de rematar en postos de ascenso na segunda volta.
