O 2021 comeza para o CV Bruxas cunha viaxe a terras castelás para enfrontarse ao Universidad Valladolid, na recuperación do encontro da cuarta xornada, o próximo sábado, 9 de xaneiro, ás 16:30 horas.
Gañar é vital para as de Bertamiráns, que deberán impoñerse a un rival directo como é o Universidad de Valladolid na loita por situarse na parte alta da clasificación. As galegas ocupan actualmente a quinta posición, con 16 puntos obtidos en cinco vitorias e catro derrotas, mentres que as vallisoletanas teñen un punto menos, cun partido aínda por disputar.
O CV Bruxas chega de colleitar unha derrota ante o líder da categoría, o CV Oviedo. As asturianas fixéronse co control do partido no primeiro set, que foi respondido con contundecia polas galegas no segundo tempo. Para o terceiro set as visitantes déronlle a volta ao resultado e colocáronse por diante, posición que xa non soltarían no resto do partido.
Podes volver vivir o encontro entre as galegas e asturianas nesta ligazón.
Por iso, as de xogadoras do equipo de voleibol de Bertamiráns agardan comezar o ano mellor que como remataron o anterior. De gañar este partido, o Bruxas tería posibilidades de colocarse no podio da táboa.
Pola súa banda, o Universidad de Valladolid chega con confianza ao encontro. Ven de impoñerse a outras universitarias, de Salamanca, cun 1-3 tras superar ao seu rival en todos os sets agás o terceiro.
Calansancias, seguinte rival do Bruxas
Os outros dous equipos galegos da Primera División Femenina de voleibol deberán agardar para estrear o novo ano. O Calasancias Coruña o fará o día 16, nun duelo galego ante o Bruxas. As ourensás do Aceites Abril deberán esperar un pouco máis, ata o 24 de xaneiro, cando se enfronten ao D’Elhuyar.
