Chega a última xornada da Primeira División no voleibol español e con ela os últimos partidos para CV Bruxas e Calasancias Coruña. O primeiro deles xogará contra o D’Elhuyar, o colista, este sábado, 27 de marzo, ás 18.00 horas. As herculinas, pola súa banda, visitarán ao Fertiberia Los Campos, o quinto clasificado.
Este será un partido máis para as de Ames, que seguirán competindo na terceira categoría do voleibol un ano máis. O Bruxas son o sexto clasificado, con 22 puntos obtidos en 7 vitorias de tres puntos, e unha derrota dun punto. En total, teñen un balance de 26 sets ao seu favor e 34 en contra.
O seu rival nesta xornada final, o D’Elhuyar, manexa cifras moito peores. As rioxanas só gañaron un partido de dous puntos e perderon outros dous dun punto, polo que só sumaron catro puntos en total, sendo o equipo con máis sets en contra: 50. Porén, son case tan anotadoras como as galegas, con 1229 puntos a favor, fronte os 1232 do Bruxas.
A este partido, no que as de Ames son anfitrioas, poderá acceder o público, cun límite de aforo de 180 persoas. Para conseguir unha entrada, é necesario contactar co número 638 66 06 33. O encontro poderá seguirse no propio Facebook do Bruxas.
Pola outra banda, as galegas do Calasancias teñen un rival máis complicado. O Fertiberia Los Campos ten no seu casilleiro 29 puntos, froito de nove vitorias de tres puntos e unha de dous. As herculinas só foron capaces de vencer en catro ocasións, pero sumando tres puntos en cada unha delas.
Este será o broche final ao primeiro ano das coruñesas na Primeira División, onde previsiblemente rematarán na oitava posición. Porén, o Universidad de Salamanca, sétimo clasificado, só ten un punto máis que as galegas, polo que unha sorpresa destas ante o Fertiberia podería permitirlles avanzar un posto.
