Unha nova cara pasará a formar parte do plantel do BAXI Ferrol. Trátase da norteamericana Brooke Salas, que chega para cubrir a baixa da tamén americana Jenna Allen.
A fichaxe xa conta con experiencia nas competicións españolas, onde formou parte na tempada pasada do Embutidos Pajariel Bembibre, disputando 29 minutos de media por partido, e nesta, nas filas do Quesos El Pastor Zamora ata o mes de decembro.
Brooke Salas: “Xogarei onde o equipo me necesite”
Agora, Brooke Salas chega ao BAXI Ferrol con ganas de aportar “velocidade, enerxía, unha actitude positiva ademais de anotar e rebotear. Xogarei onde o equipo me necesite”, declarou a xogadora.
Brooke Salas, unha xogadora moi completa
Por parte do que será o seu adestrador, Lino López, o técnico considera á norteamericana como unha xogadora moi completa. “Brooke Salas é unha xogadora moi polivalente, con moita capacidade ofensiva para xerar no poste, con bo tiro exterior e, sobre todo, que sempre busca a mellor opción para o equipo. É unha boa pasadora, xerosa no xogo ofensivo e que fai mellor ás súas compañeiras”, declarou.
Lino López: “Brooke Salas é unha xogadora moi polivalente”
A isto engadiu que a baloncestista tamén aportará en defensa, onde destaca nas accións de rebote e na súa actitude. “Todos os informes que temos a nivel persoal son moi bos en temas de esforzo, de traballo diario e creo que é un complemento perfecto e que vai axudar ao equipo a crecer”, asegurou López.
Salas chega para suplir a Jenna Allen quen, debido a unha lesión, non volverá ao parqué no que resta de tempada. A fichaxe confesou que os motivos que a levaron a escoller o equipo galego foron porque “escoitei moitas cousas boas sobre o club e creo que é un bo sitio para min”.
Jenna Allen supera con éxito unha operación no tendón de Aquiles
