A Selección Galega de karate vén de acadar a medalla de bronce no transcurso da cuarta edición do Memorial Ángel Sáez.
Trátase dunha competición deportiva de karate organizada pola Federación Madrileña desta disciplina deportiva. En concreto faise para a modalidade de kumite por equipos mixto.
A Federación Galega de Karate e disciplinas asociadas clasificouse para as semifinais deste Memorial Ángel Sáez de karate, tras situarse no primeiro lugar do seu grupo, ao vencer ás seleccións de Cantabria, Castilla La Mancha e Andalucía.
Na ronda de semifinais, a Selección Galega de karate cedeu ante a Selección de Madrid, obtendo finalmente a terceira posición nesta competición, segundo informa a Federación Galega de Karate e D.A.
