- O conxunto alevín do Ximnasia Oleiros Rítmica e Estética abraiou no Campionato de España de Conxuntos Base cun exercicio de gran valor artístico, enorme dificultade e unha execución excepcional baseado na historia de Pinocho
O pavillón Navarra Arena de Pamplona vén de acoller o Campionato de España de Conxuntos Base e a Terceira Fase da Copa de España de Conxuntos no que o do Ximnasia Oleiros Rítmica e Estética vén de consolidarse como un dos mellores equipos do panorama estatal.
Cunha coidada coreografía de bailarinas baseada na historia de Pinocho e unha fantástica execución, o conxunto alevín formado por Sara Reza, Paloma Casanova, Satya Fernández, Valentina Torres e Vera Boedo conseguiu unha puntuación de 20.500, que as levou ó terceiro posto dunha categoría, especialmente competitiva na que participaron 70 equipos de toda España.
Trátase dunha “nova medalla a nivel nacional que premia o talento, esforzo e compromiso das ximnastas, o equipo técnico e as familias”, salientan desde o club oleirense.
En palabras das adestradoras Anais Freire, Eva Gonzalez e Rebeca Freire: “É unha medalla moi especial, que recoñece o traballo de todo un ano” comezamos con este exercicio en xaneiro, participamos na Copa de España onde obtiveron un 10 posto, durante toda esta tempada o equipo foi consolidándose, proclamándose campioas galegas o pasado novembro e culminando cun maravilloso exercicio neste Campeonato de España.
“É unha medalla moi especial, que recoñece o traballo de todo un ano”, din as adestradoras
Destacan tamén as adestradoras do club Ximnasia Oleiros Rítmica e Estética que para elas “é moi importante transmitirlle a estas ximnastas a importancia do traballo en equipo, todas as pezas do puzle son importantísimas e cando hai armonía entre elas refléxase no tapiz. Son ximnastas que teñen entre 9-11 anos, (dúas delas xa foran bronce nacional na categoría pre benxamin en 2019) e que adestran entre 12 e 14 horas á semana”.
As juniors do Ximnasia Oleiros Rítmica e Estética, oitavas na Copa de España de conxuntos absoluta
Ademais o conxunto junior do club colocouse de novo no top ten estatal, rematando en oitava posición na Copa de España de conxuntos absoluta e o equipo infantil finalizou a competición na vixésimo terceira posición dun total de 110 equipos.
No club oleirense explican que esta suma de resultados é “todo un éxito do que estamos moi felices, sobre todo por ver as caras de alegría ó saír do tapiz, contentas e satisfeitas polo traballo realizado. Non hai mellor maneira de rematar a tempada”.
O club Ximnasia Oleiros Rítmica e Estética, leva máis de 20 anos formando ximnastas e promocionando a actividade física, o traballo en equipo e os valores do deporte.
