- As galegas Sara Cortegoso (-46, Mace Sport) e Arlet Ortiz (-57, Mat´s) acadaron a medalla de bronce na President´s Cup de taekwondo, que se está a disputar en Estambul.
Sara Cortegoso, que viaxaba coa Federación Galega de Taekwondo, acadou o metal tras superar en primeira rolda á turca Seher Tur Sen con bastante superioridade.
Nos cuartos de final a deportista galega tivo unha loita moita máis pechada coa española Sofía Marquina, que se decidiu no terceiro asalto, con triunfo de Sara Cortegoso. A galega só caeu derrotada na semifinal ante a alemá Sueheda Ger Celik, quen finalmente logrou a medalla de prata.
Sara Cortegoso lidera o ránking español
Con este resultado, Sara Cortegoso colócase primeira no ránking estatal para ir ao campionato do mundo.
Pola súa banda, Arlet Ortiz (convocada coa Federación Española de Taekwondo) logrou subir ao podio a recoller o seu bronce tras superar en primeira rolda á española María Jiménez (2-1) e nos cuartos de final á ucraína Darya Kostenevych, tamén en tres asaltos.
Na semifinal Arlet Ortiz caeu ante Hatice Kubra Ilgun (Alemaña), deportista cun curriculum espectacular (medallista olímpica en Tokyo, campioa de Europa, prata e bronce mundial) e que foi a deportista que logrou o ouro nesta President´s Cup.
Ademais, tamén participaron na President´s Cup feminina Irene Montemuíño (-62, Natural Sport), Alma Pérez (-53, Suh Sport) e Tania Castiñeira (+73, Hebe).
Irene Montemuiño caeu en segunda rolda tras superar á turca Kevser Ilikcioglu en dous asaltos e perder nos oitavos de final ante a croata Ivana Arelic.
No caso de Alma Pérez a taekwondista galega perdeu no primeiro combate ante a oponente turca Oyku Ozbey en tres asaltos.
Para finalizar cos resultados obtidos pola expedición galega nesta President´s Cup en Estambul, Tania Castiñeira foi eliminada por Dagmara Haremza (Polonia).
