- Este sábado no CAR de León tivo lugar a Copa de España de Halterofilia na que Irene Martínez acadaba o bronce na categoría absluta.
Este campionato celebrouse en seis categorías: sub-15, sub-17 e absoluta masculina e feminina. Foi a primeira vez que se organizaron todas estas categorías nunha soa xornada, xa que ata o de agora os absolutos competiron en concurso separado.
Están convidados para participar os dez primeiros da clasificación nacional anual da Real Federación Española de Halterofilia, un total de 60 deportistas.
Desde o Club Halterofilia Coruña aceptaron a invitación sete levantadores:
- Irene Martínez, Víctor Castro e Martín Liste na categoría absoluta.
- Darío Barros na de Sub-17.
- Daniel García, Daniel Rey e Digna Silo na categoría Sub-15.
Digna Silo volveu á tarima despois de gañar as tres medallas de prata da súa categoría no pasado Campionato de Europa Sub-15, mentres para Irene Martínez e Víctor Castro esta competición foi o último control antes da súa inminente participación no Campionato do Mundo Absoluto en Arabia Saudita.
Cuarto posto e récord na Copa de España para Digna Silo
Digna Silo iniciou a xornada na categoría Sub-15 feminina. Destacou na modalidade de arrancada realizando os seus tres intentos válidos e establecendo novo récord de España con 76 quilos.
En dous tempos fallou por moi pouco os seus dous últimos intentos con 92 o que lle daría o subcampeonato, pero ao final tivo que conformarse co cuarto posto cos 87 quilos rexistrados nesta modalidade e con 163 en total olímpico o que supón unha puntuación de 195,27 puntos Sinclair.
Na categoría Sub-15 masculina Daniel García finalizou sétimo con 185 quilos no total olímpico e 240, 68 puntos, Daniel Rey oitavo con 195 quilos, 235,61 puntos Sinclair. Na categoría de Sub-17 Darío Barros foi sétimo nesta Copa de España con 197 quilos, 288,01 puntos.
Bronce absoluto de Irene Martínez
Na seguinte quenda chegou o podio da man da haltera do Club Halterofilia Coruña Irene Martínez. A deportista galega conseguiu a medalla de bronce da categoría absoluta con 192 quilos no total olímpico o que equivale a 259,87 puntos Sinclair. A gañadora foi a valenciana Alba Sánchez con 267,26 puntos e a segunda Sira Armengou de Cataluña con 260,08.
Ver esta publicación en Instagram
Na última competición Víctor Castro quedou a un paso do podio. Os seus 282 quilos no total e os 399,98 puntos Sinclair clasificáronlle no cuarto posto da categoría absoluta. Martín Liste finalizou sexto nesta Copa de España con 321 quilos e 383,49 puntos.
O podio foi David Sánchez da Federación Andaluza con 442,32 ptos, o asturiano Alberto Fernández con 417,56 puntos e o melillense Ismael Jamali con 406,65 pts.
