- A deportista do CH Coruña, Ruth Fuentefría, vén de acadar a medalla de bronce na modalidade de arrancada no Campionato de Europa Junior e Sub-23 de halterofilia que se está a celebrar
Na capital de Romanía, Bucarest, celébranse nestas datas o Campionato de Europa de halterofilia Junior, que inclúe a deportistas ata os 20 anos, e o Sub-23. Para esta cita deportiva foron seleccionadas dúas deportistas do Club Halterofilia Coruña. Na idade Junior, Ruth Fuentefría, e na Sub-23, Irene Blanco. A primeira xa acadou medalla, a segunda aínda ten que competir.
Ruth Fuentefría abriu a lata das medallas para a halterofilia feminina galega nos Europeos que está acollendo Bucarest estes días. A haltera do CH Coruña competiu na categoría de peso corporal de 45 quilos. A nosa deportista, medallista nos pasados Europeos e Mundiais xuvenil e junior, tivo unha excelente actuación na modalidade de arrancada. Nesa competición Fuentefría acadou a medalla de bronce con 68 quilos, detrás da turca Cansu Bektas (70 quilos) e a salmantina Marta García (69kg).
Mellor marca persoal de Ruth Fuentefría en dous tempos
Na modalidade de dous tempos, tradicionalmente a súa modalidade máis ‘frouxa’, esta vez saíulle unha competición impecable ao asinar tres intentos válidos sobre 79 quilos (que supón a súa mellor marca persoal). Ese levantamento situou a Ruth Fuentefría no cuarto posto tanto nesta modalidade como no total olímpico, ao sumar 147 quilos, neste último, a deportista do CH Coruña quedou a tan só 1 quilo do podio.
O podio de dous tempos foi para Bektas con 85, a turca Altun Ganze con 84 e Marta García con 83. No total olímpico subiron ao podio Bektas (155), Marta García (152) e Altun Ganze (148)
O vindeiro mércores 2 de agosto será a quenda dos Sub-23 e entrará en competición a tamén galega do CH Coruña Irene Blanco que se encadra na categoría de 87 quilos.
