Poison Isy, xogadora e capitana do equipo de Roller Derby As Brigantias A Coruña foi escollida a pasada semana como a nova presidenta da Asociación de Roller Derby Española (ARDE). Poison Isy leva no equipo e na comunidade Derby dende o ano 2013 e no ano 2018 participou na organización dos WFTDA Playoffs na Coruña polo que a súa experiencia é moi valiosa para aportar á asociación para que siga medrando.
ARDE é unha asociación de ámbito nacional que xurdiu no ano 2017 e ten por obxectivos promocionar e fomentar o Roller Derby de pista plana. Tamén busca fomentar o desenvolvemento da habilidade atlética e a deportividade entre os equipos membros.
Esta asociación atópase suscrita baixo a normativa e ideais da WFTDA (Woman’s Flat Track Roller Derby Asociation) que é o corpo de goberno oficial a nivel internacional. A súa filosofía é “por e para as patinadoras”. Son as propias patinadoras as que dirixen os seus equipos e toman as decisións organizadas en distintos comités: organización, adestramento, comunicación, recrutamento, interliga, deseño, etc.
Esta elección chega nun momento excelente para As Brigantias, xa que desde hoxe, xoves 11 de xuño, poderán retomar os adestramentos na pista de Monte Alto de 20h a 23h no que se practicarán habilidades básicas de patinaxe ata que se poida retomar o contacto. A estes adestramentos están convidadas ademáis das xogadoras do equipo todas as novas patinadoras que estean interesadas en unirse ao equipo ou coñecer máis sobre este deporte e sobre As Brigantias.
