Esta tarde de sábado (16 de xaneiro) ás 20:00 horas celébrase de xeito unificado toda a xornada da OK Liga Feminina, incluído o cruce entre Garatge Plana Girona CH e HC Borbolla. As dúas últimas xornadas desta fase de competición xogaranse así.
Galegas e catalás teñen un ollo posto precisamente na seguinte fase na que parecen chamadas a loitar pola permanencia na categoría. É, ademais, unha gran ocasión para recurtar distancias cun rival directo. Na táboa están separadas por tres puntos. Xustamente os que están en xogo neste cruce. Se vencen as coruñesas, empatan na clasificación. Hai que ter en conta que o Girona ten un partido menos.
Santi Martínez, adestrador HC Borbolla, admite que é un “partido moi importante porque, se ao final elas non se meten no grupo de arriba, serían puntos que sumamos. Eso, de cara á seguinte fase da competición, colocaríanos nunha boa posición no intento de salvarnos do descenso”.
O HC Borbolla ten tocada a Fernanda Muñoz pero non será baixa
Con respecto ás baixas, o preparador do HC Borbolla, explica que por sorte ten a todas as xogadoras ao seu dispór. “Temos un pouco tocada a Fernanda Muñoz, pero non é nada… unhas simples molestias na perna. Xa estivo con Óscar, o noso fisioterapeuta, e non haberá problema para que xogue contra o Girona“.
Na primeira volta da competición o Borbolla impúxose 4-0 ao Garatge Plana Girona CH pero cada encontro é un mundo, e o propio conxunto coruñés ten pouco que ver con aquel. A evolución das galegas fai que o seu xogo esté moito máis elaborado. “Naquel partido da ida saíronnos as cousas ben, pero non foi doado”, lembra Santi Martínez.
“Estou convencido de que este vai ser difícil debido a que elas tamén se xogan moito. Incluso manter opcións de cara a se meter no grupo das que van loitar polo título”, di Santi Martínez sobre o partido desta tarde do HC Borbolla e Cataluña. Tal e como apunta o entrenador das herculinas, se vencen, as catalás manteñen opcións de evitar a loita por manter a categoría, xa que teñen tamén a tiro esas posicións.
O partido poderá seguirse desde a canle de Youtube do conxunto catalá