Regresa o HC Borbolla cunha derrota do seu cruce co Telecable HC. O conxunto de Gijón endosou un 8-2 ás galegas que terán que agardar outra semana máis para poder puntuar.
O rival era dos fortes da categoría, pero a sorte tampouco é que estea de cara ás coruñesas. Unha xornada máis perden xogadoras no transcurso do partido por mor dunha lesión. Se na anterior xornada foi a porteira Fernanda Tapia, nesta ocasión mancáronse Julia e Bea. A primeira levou un forte golpe no cóbado. En principio todo indica que foi simplemente o golpe, que sendo moi molesto no momento, non debera ir a máis. No caso de Bea hai máis dúbidas. Ten o xeonllo inflamado e terán que dicir os médicos a que se debe.
Segundo explicaba o adestrador das coruñesas, Santi Martínez: “Custounos entrar no partido. Así, aos oito minutos de xogo xa perdiamos por 2-0. Asentámonos un pouco máis e xa empezamos a estirarnos máis. Sen embargo, metéronnos dous goles máis antes de que lograsemos acurtar distancias”.
Santi Martínez, adestrador do HC Borbolla: “Custounos entrar no partido. Así, aos oito minutos de xogo xa perdiamos por 2-0. Asentámonos un pouco máis e xa empezamos a estirarnos máis. Sen embargo, metéronnos dous goles máis antes de que lograsemos acurtar distancias”.
Explica o técnico das de Monte Alto que o gol de Lara, que puña o 4-1 no electrónico na cancha asturiana, “deunos un pouco máis de confianza e tivemos varias ocasións”. Pero antes de pór rumbo a vestiarios, as de Gijón volverían contar con ocasións. Mandaron tres tiros aos paus e remataron por anotar por medio de Rebeca González que transformaba un penalti. Ao descanso chegouse con ese 5-1 no marcador.
Golazo de Bea Pedreira en Gijón
Xa na segunda metade o HC Borbolla coruñés saltou á pista con ganas e actitude. “Saímos mellor e logramos tutear ao Telecable HC“, explica o adestrador das herculinas. De feito, foi neses minutos de bo xogo cando as galegas acadaban o seu segundo gol. Beatriz Pereira montaba unha contra que finalizaba cun potente disparo co que introducía a bola pola escuadra da meta defendida por Eva Meijido. “O segundo gol foi un forte chut de Bea”, explica Santi Martínez.
As galegas apretaron en defensa, pero as asturianas son un equipo doutra Liga e amosáronse sobre a pista como un conxunto superior. Con todo ao fío dese segundo gol o HC Borbolla colleu folgos e adiantou a súa zaga buscando achegarse máis á meta rival e desprazar ás asturianas do seu marco. Unha vez máis guardameta Fernanda Tapia foi unha das mellores entre as ‘tomatitas’.
Pero tanto vai o cántaro á fonte que ao final… As xogadoras dirixidas por Fernando Sierra volveron perforar a meta da cancerbeira chilena do Borbolla. O 6-2 foi obra de Marta Piquero que transformaba unha pena máxima abrindo de novo unha fenda grande no tanteo para as de Gijón.
Sara Roces con tres goles, dous deles na recta final do encontro, foi a máxima goleadora do partido. As coruñesas encaixaron dous tantos de penalti. Tal e como explica o adestrador das galegas, Santi Martínez: “Nos últimos minutos metérnnos dous goles que deixaron o resultado un tanto avultado para os méritos de ambos os dous equipos, aínda que está claro que o equipo asturiano foi superior a nós no total do partido”.
O adestrador explicaba tamén que o conxunto coruñés acusara nese final de choque as lesións de Julia e Bea
Pensando na vindeira xornada
As de Gijón chegan así co moito ánimo e tranquilidade na táboa ao derbi asturiano que as enfrontará a vindeira semana ao ENE Oposiciones Cuencas Mineras, que esta fin de semana no xogou por ter que aprazarse o seu encontro co Cerdanyola. Adiouse tamén nesta quinta xornada no Grupo A o Garatge Plana Girona CH – CP Las Rozas.
Pola súa parte o HC Borbolla recibirá ao Garatge Plana Girona CH o sábado 31 de outubro ás 16:00 horas no Pavillón de Monte Alto na Coruña. Trátase do único equipo do Grupo A, xunto coas coruñesas, que aínda non coñece o triunfo.
FICHA TÉCNICA
TELECABLE GIJÓN: Eva Meijido, Marta Piquero, Natasha Lee, María Sanjurjo e Sara Roces – quinteto inicial -. Tamén xogaron: Rebeca González, Vanessa Daribo, Nuria Obeso, Ángela Fernández e Elena Lolo.
HC BORBOLLA: Fernanda Tapia, Bea Pereira, Fernanda Muñoz, Lucía Yáñez e Julia Cabanas – quinteto inicial -. Tamén xogaron: Lara Yáñez, Antía Rivadas e Marta Vilas.
GOLES: 1-0 min. 5 Marta Piquero. 2-0 min. 7 Natasha Lee. 3-0 min. 16 Sara Roces. 4-0 min 19 Natasha Lee. 4-1 min 19 Lara Yáñez. 5-1 min. 22 Rebeca González (penalti). 5-2 min 31 Bea Pereira. 6-2 min 37 Marta Piquero (penalti). 7-2 Min 46 Sara Roces. 8-2 min 47 Sara Roces.
ÁRBITRO: Enrique Díaz. Sen cartóns.
INCIDENCIAS: Partido correspondente á quinta xornada da OK Liga Feminina de hoquei sobre patíns. Disputado no pavillón Mata Jove de Gijón (Asturias).
