O negro e vermello manda na Liga Senior Feminina de Hoquei a Patíns. Se na primeira xornada as de Monte Alto se impoñían ao HC Deportivo Liceo 3-1, nesta segunda foron aínda máis contundentes co Compañía de María ao que gañaron por 8 tantos a 1. Estas dúas victorias colocan as coruñesas líderes da táboa clasificatoria.
No outro partido disputado esta fin de semana o HC Cambre colleitaba a súa primeira victoria ao vencer ao CH Raxoi por un marcador de 4-1
Suma e segue para o HC Borbolla
Segundo partido, e segunda victoria para as coruñesas que adestra Santiago Martínez. As de Monte Alto están a dominar a táboa e teñen a mirada posta no obxectivo de afianzarse arriba e pasar á seguinte fase competiva. Segundo explicaba o técnico “este resultado reforza o traballo que está a realizar a plantilla e nos dá máis motivos para seguir a traballar máis e máis en cada adestramento á procura de tentar acadar o difícil obxectivo final”.
Esta fin de semana tiñan enfronte de novo a un rival difícil, o Compañía de María ao que venceron por un marcador avultado, 8-1. “A verdade é que xogamos un primeiro tempo bastante completo, sobre todo tivemos fases con un ritmo de circulación de bola alto que nos permitiu coller unha ampla vantaxe antes do descanso”, explicaba Martínez sobre o encontro. “Durante todo o partido logramos crear moitas ocasións de gol desbaratadas unhas veces pola gran actuación da porteira de Compañía e outras por erros nosos na definición”, analizaba o técnico.
Santiago Martínez, adestrador do Borbolla: “Xogamos un primeiro tempo bastante completo, sobre todo tivemos fases con un ritmo de circulación de bola alto que nos permitiu coller unha ampla vantaxe antes do descanso”
Na súa análise do partido, Álvaro Franqueira, adestrador do Club Compañía de María admitía que o HC Borbolla “mereceu gañar”, pero matizaba que o equipo que prepara non mereceu “unha derrota tan avultada. Ata o primeiro gol o estabamos a facer ben, defendendo ordenadas e creando algunhas ocasións en ataque. O primeiro gol é despois dunha tarxeta azul, en inferioridade. A partir de aí tivemos un minuto no que perdemos a concentración e nos meteron dous goles seguidos. O cuarto foi un penalti”, rememora o Franqueira.
Álvaro Franqueira, técnico do Compañía de María: “O Borbolla mereceu gañar, pero nós non merecimos unha derrota tan avultada”
Desde o outro banco, o adestrador do HC Borbolla apuntaba sobre este cruce co Compañía de María que lles saíu “un bo partido. Logo dos típicos primeiros minutos de tanteo logramos o obxectivo que tiñamos de marcar o ritmo do encontro, levar o peso do xogo e que se xogara máis do xeito que máis nos conviña”. Aí sitúa o adestrador das locais a chave do partido en acadar o control do encontro e xogar ao ritmo que máis lles interesaba.
Franqueira, Cía de María: “Esperamos dar máis guerra na segunda volta”
Destacaba Álvaro Franqueira, adestrador do Club Compañía de María, que a pesar de “ir moi por debaixo no marcador, intentamos non perderlle a cara ao partido e seguir competindo. Pero ao empezar a segunda parte pitáronnos un penalti e unha azul a María (a nosa porteira)”. Segundo relata Franqueira esa exclusión motivou que tivera que pórse baixo paus unha xogadora, Mabel, “Neses dous minutos, co penalti e dous tiros exteriores xa se nos alonxaron demasiado no marcador”.
No seu balance do partido, o técnico do Compañía considera que ao final “quitando un minuto na primeira parte e dous da segunda, creo que non fixemos mal partido”. Como lección cara ao futuro, Franqueira apunta: “Temos que aprender do que fixemos mal pero creo que tamén sacamos moitas cousas boas”.
Álvaro Franqueira, técnico do Compañía de María: “Temos que aprender do que fixemos mal, pero creo que tamén sacamos moitas cousas boas”
O adestrador das de azul e amarelo mira cara adiante con esperanza e confianza no bloque que adestra e advirte: “Esperamos dar máis guerra na segunda volta”.
FICHA TÉCNICA
HC BORBOLLA: Edén Avecilla (P), Jimena Ortiz, Valentina de Girolamo, Alba Díaz ( C) , Ainhoa García, Lucía Yáñez, Lucía Castro, Lara Yáñez e Beatriz Pereira. Fernanda Tapia (P)
CLUB CÍA MARÍA: María Hernández (P), Sofía Martínez, Claudia San Miguel, Nuria Ares, Mabel Garea, Lola Suárez, Marta Vilas, María Sáenz( C), e Estela Aradas.
RESULTADO: 8-1
GOLES:
Polo HC Borbolla anotou Jimena Ortiz (3), Ainhoa García (1), Lucía Yánez (1) e Beatriz Pereira (3)
Polo Club Cía de María marcou María Sáenz (1).
COLEXIADOS: Árbitro: Nicolás Morandeira. Cronometradora: María Jesús Vázquez. Amonestaron con cartulina azul a Marta Vilas e María Hernández do Compañía de María.
INCIDENCIAS: Pavillón Monte Alto (A Coruña). Partido correspondente á segunda xornada da Liga Senior Feminina Autonómica da Federación Galega de Patinaxe.
MIRA EN YOUTUBE O HC BORBOLLA – COMPAÑÍA DE MARÍA
O CH Raxoi debuta en Cambre con derrota
Un empate 2-2 diante do Compañía de María fora o resultado colleitado polas cambresas na primeira xornada. Nesta segunda medíanse a un equipo que aínda non disputara minutos nesta competición debido a que o cruce entre as compostelás e o APG Bierzo, previsto para a primeira xornada, tivo que ser aprazado. As locais acadaron o triunfo por 4-1 na cancha dos Campóns. Cun bo partido en defensa, ás visitantes do Raxoi faltoulles se cadra, máis tino cara a meta rival. Así o deixaba entrever o seu adestrador.
Así, aínda que o Raxoi xa competira na Copa Federación, esta xornada era o debut das santiaguesas na competición ligueira. Segundo explica o adestrador das compostelás, Pedro Siaba, “había ganas de mellorar con respecto á actuación na Copa e nese sentido creo que puido notarse un poucos os nervios propios dun debut”.
Pedro Siaba, técnico do CH Raxoi: “Poideron notarse un poucos os nervios propios dun debut”
Neste cruce as visitantes tiñan ausencias e xogadoras tocadas. “Para esta xornada contabamos coas baixas de Antía Rivadas, capitana do equipo e de Laura Vigoya, que se incorporou durante este parón de Nadal, ademais Noa Fuentes estaba tocada e polo tanto non no seu mellor momento fisicamente”.
Con ausencias e todo, o técnico do Raxoi considera que o bloque que adestra foi quen de facer “un partido serio. Con erros, pero cun bo nivel de concentración e de solidez defensiva. No ataque, sen embargo, tivemos un mal inicio, titubeante ante a presión defensiva das xogadoras do Cambre nos primeiros compases do encontro. Aínda que a medida que avanzou o tempo melloramos neste aspecto, faltounos contundencia de cara a portería”.
Pedro Siaba, técnico do CH Raxoi: “No ataque tivemos un mal inicio, titubeante ante a presión defensiva das xogadoras do Cambre nos primeiros compases do encontro. Aínda que a medida que avanzou o tempo melloramos neste aspecto. Faltounos contundencia de cara a portería”
O adestrador do CH Raxoi, Pedro Siaba, explicaba que o equipo que dirixe competiu “durante todo o partido e obligámolas a manter un nivel alto de intensidade para non perder a vantaxe no resultado. Na miña opinión, non vin unha gran diferencia de nivel en liñas xerais entre os dous equipos, pero dende logo elas souberon converter dun xeito moito máis efectivo as súas ocasións, aínda que o nivel de ambas porterías estivo moi alto durante todo o encontro”.
Consultado por momentos chave do partido, o técnico das compostelás comenta que posiblemente o 3-0 “sentenciou o partido xa que a diferencia no marcador fíxose moi ampla, ademais veu provocado dun erro defensivo e dificultou notablemente as nosas posibilidades de remontada”.
Pedro Siaba, adestrador do CH Raxoi: “Non vin unha gran diferencia de nivel en liñas xerais entre os dous equipos, pero elas souberon converter dun xeito moito máis efectivo as súas ocasións, aínda que o nivel de ambas porterías estivo moi alto durante todo o encontro”
FICHA TÉCNICA
HC CAMBRE: Evelyn Montes de Oca (P), Celia Pinacho, Lucía Parga ( C), Ana López, Alba Rey, Raquel Parga e Cristian Diz.
CH RAXOI: Irene Regueiro (P), Julia González, Celia González, Martina Barros, Noa Fuentes, Uxía Pereiro, Alba Arosa, Irene Regueiro e Sara Canabal (P).
RESULTADO: 4-1
GOLES:
Polo HC Cambre anotaron: Lucía PArga (1), Raque Parga (1) e Cristina Diz (2).
Polo CH Raxoi anotou: Uxía Pereiro (1).
COLEXIADOS: Árbitro: Lorenzo Bosch. Cronometradora: Iago Regueiro Neira. Amonestaron con cartulina azul a Uxía Pereiro do CH Raxoi.
INCIDENCIAS: Pavillón dos Campóns (Cambre). Partido correspondente á segunda xornada da Liga Senior Feminina Autonómica da Federación Galega de Patinaxe.
A vindeira xornada xogarase na fin de semana do 29 de febreiro cos cruces:
- APG BIERZO – DEPORTIVO LICEO
- APG BIERZO – HC BORBOLLA
- DEPORTIVO LICEO – HC CAMBRE
- CH RAXOI – CLUB CIA MARIA
