Puntuar en todos os partidos, até cos rivais máis complicados, como era o Vila-Sana. Esa é a consigna do HC Borbolla nesta fase pola permanencia. O seu técnico, Santi Martínez, acudía a esta cita confiado no potencial das súas pupilas. “O Vila-Sana é un equipo moi forte pero confío plenamente en que poderemos puntuar”, dicía. Non ía tan descamiñado, pero ao final, o seu prognóstico non se cumpliu.
As deportistas que integran a plantilla do HC Borbolla xóganse a vida e chegan a esta etapa competitiva moito máis maduras, compenetradas e seguras de si mesmas con respecto a como iniciaron a súa andaina este curso de retorno a Ok Liga feminina. Pero nin iso, nin as ganas de puntuar, abondaron para que as tomatitas rañaran puntos na súa saída desta fin de semana.
As pupilas do técnico Santi Martínez caían derrotadas por 3-2 na cancha do CP Esneca Vila-Sana logo de remontar até o empate.
No comenzo do partido as galegas recibían un tanto de María Porta Escoda que adiantaba las locais (1-0) no electrónico. A falta de 12 minutos, e logo dun tempo morto pedido polo Hockey Club Borbolla, chegaría o segundo obra de Jimena Soledad Ortiz Sese (2-0). Segundo mazazo.
A igualada do Borbolla
Pero as galegas non se viñeron abaixo. Ao contrario. Xusto un minuto despois anotaban o seu primeiro tanto en iniciaban o camiño cara á remondatada 2-1. O gol foi obra da lusa Beatriz Pereira Varzeas.
O empate, acontecía pouco tempo despois. Fernanda Muñoz lanzaba unha falta directa sen éxito pero na continuación da xogada Bea Pereira Varzeas volvía a anotar colocando o 2-2 a menos de 10 minutos para o final da primeira metade.
Con dous minutos e medio de partido para chegar ao descanso, Lluis Rodero, técnico das catalás, solicitaba un tempo morto. E a 23 segundos do bucinazo, que enviaría ás xogadoras a vestiaros, anotou para a escuadra local o 3-2 Victoria Porta Escoda, irmá da autora do primeiro gol. Todo quedaba na casa, tamén os tres puntos en xogo.
Na segunda metade, o electrónico non se moveu en Vila-Sana. O 3-2 do primeiro período non tivo variaciónn posible e outorgou, finalmente, o trunfo ao CP Esneca Vila-Sana diante dun HC Borbolla que acudia co anhelo de puntuar nunha cancha complicada e que, durante minutos, acariñou esa posibilidade como certa.
O seguinte rival das galegas será o Areces Ecopilas Arturhockey ao que recibirán o vindeiro sábado, 27 de febreiro, na Coruña. A pista de Monte Alto acollera o partido que, en principio, está fixado para iniciarse a partir das 19:00 horas. As asturianas veñen de gañar ao CP Alcorcón e son un rival máis que directo na loita por salvarse do descenso. So serve gañar.
FICHA TÉCNICA
CP ESNECA VILA-SANA: Anna Ferrer Santacana, Laura Porta, Joana Comas Vila, María Porta Escoda (C) e Victoria Porta Escoda – quinteto inicial -. Tamén xogaron: Jimena Soledad Ortiz Sese, Vinyet Flix Lázaro e Regina Flix Lázaro. Sara Céspedes Pascual (P.S.)
HC BORBOLLA: Fernanda Tapia, Julia Cabanas, Lara Yáñez, Fernanda Muñoz e Lucía Yáñez – quinteto inicial -. Tamén xogaron: Antía Rivadas, Alba Díaz (C), Marta Vilas, Beatriz Pereira Varzeas. Edén Avecilla (P.S.).
GOLES: 1-0 min. 2: María Porta Escoda. 2-0 min. 13: Jimena Ortiz Sese. 2-1 min. 14: Beatriz Pereira Varzeas. 2-2 min. 16: Beatriz Pereira Varzeas. 3-2 min. 24: Victoria Porta Escoda.
ÁRBITRO: Arbitrou o encontro o colexiado Alan Navarro Mir que tivo como árbitro auxiliar a Jospe León Ruiz. Foron sancionadas durante o partido, con cartulina azul, a xogadora local Regina Flix Lázaro, así como a deportistas visitante Julia Cabanas Pereira.
INCIDENCIAS: Partido correspondente á xornada dúas do Grupo D da Ok Liga Feminina no que os equipos clasificados na primeira fase do 9º ao 16º loitan pola permanencia. O encontro, entre CP Esneca Vila-Sana e HC Borbolla, disputouse no Pavelló Municipal de Vila-Sana na localidade do mesmo nome.
