- Empezan os preparativos para a disputa do play-off de ascenso a Primeira RFEF Futsal Feminino para o Viaxes Amarelle FSF ante o La Boca Te Lía Futsal Alcantarilla.
Tempada regular finalizada, cun Viaxes Amarelle FSF campión de liga e que rexistrou uns números excepcionais. A carta de presentación das laranxas é impecable e permitiulle clasificarse para xogar os play-off de ascenso á Primeira RFEF Futsal Feminina coa vantaxe de xogar en cancha propia nun duelo a partido único.
O club herculino empezou xa os preparativos para poder gozar dun play-off, onde as herculinas pelexarán polo ascenso directo este sábado 4 de xuño de 2022, a partir das 18:00 horas no Pavillón Municipal de Sagrada Familia (A Coruña), recibindo ao conxunto de La Boca Te Lía Futsal Alcantarilla.
O Viaxes Amarelle FSF afronta con normalidade unha semana que será clave para a loita das herculinas por poder devolver o club á máxima categoría nacional do futsal feminino. O club quere que o partido ante o equipo La Boca Te Lía Futsal Alcantarilla sexa unha festa do fútbol sala feminino e que o público se envorque coas xogadoras, para que poidan conseguir o obxectivo, que agora teñen tan preto.
O escenario será o mesmo que a escuadra herculina leva facendo gozar ao seu público durante toda a tempada, e onde ademais adestra durante as últimas tempadas. O Pavillón Municipal de Sagrada Familia (A Coruña) será a cancha que albergará este play-off de ascenso. As laranxas esperan que a calor do público aúpe ao obxectivo á escuadra coruñesa.
Sabendo que se trata dun pavillón cun aforo mediano, o club aconsella a todos os interesados en acudir ao play-off que reserven a súa entrada a través da páxina do club, habilitada para o efecto, na ligazón seguinte: https://amarellefsf.com/entradas-play-off/
Todas as persoas sociss disporán dunha invitación persoal para o partido e poderán adquirir ata 4 entradas adicionais con cada carné de socio para este partido contra o La Boca Te Lía Futsal Alcantarilla.
Así é o formato do play-off de ascenso no que está o Viaxes Amarelle FSF
É importante coñecer o formato do play-off de ascenso da presente tempada xa que ten as súas particularidades. Como na competición existen catro grupos e só hai 3 ascensos directos á Primeira RFEF Futsal Feminina hai que comprender ben o formato competitivo.
Nesta primeira eliminatoria, os equipos que se clasificaron como primeiros dos seus respectivos grupos mídense entre si, por enfrontamentos segundo coeficientes; e os gañadores desta primeira eliminatoria, a partido único. Conseguirán o ascenso á elite do fútbol sala feminino, mentres que os perdedores poderán dispoñer dunha opción nunha segunda fase eliminatoria.
Neste mesma fin de semana, e á vez que os primeiros clasificados, enfrontaranse tamén os segundos clasificados dos seus grupos entre si, conseguindo os equipos gañadores desta primeira eliminatoria, clasificarse para unha segunda fase eliminatoria, mentres que os equipos perdedores quedarán fóra da fase de ascenso.
Os dous primeiros clasificados que non consigan a vitoria nesta primeira eliminatoria, enfrontaranse en semifinal e final contra os clasificados como segundos que conseguisen clasificarse na súa eliminatoria; e os dous equipos gañadores desta segunda eliminatoria, enfrontaranse nunha terceira eliminatoria pola última praza de ascenso directo.
Retransmisión en streaming do partido co Alcantarilla
Tras recibir a comunicación de que a RFEF non vai emitir os encontros a través da plataforma que teñen contratada o club herculino informa de que apostou por darlle visibilidade ao futsal feminino e vai emitir o encontro a través da propia canle de You Tube do club coruñés.
Deste xeito, tanto os afeccionados propios que non poidan asistir ao encontro, como os afeccionados visitantes do Alcantarilla que non poidan desprazarse, e o mundo do fútbol sala feminino, poderán “gozar dunha final por unha das prazas que dan como premio o ascenso directo á máxima categoría nacional”, explican desde o Viaxes Amarelle FSF.
Desde a entidade coruñesa fan fincapé en que “a retransmisión se realizará nas mellores condicións posibles, e entendendo que é unha realización non profesional debido a que o farán voluntarios colaboradores do club de maneira altruísta”.
