Os dous equipos galegos da máxima categoría do balonmán feminino estatal, Mecalia Atlético Guardés e Conservas Orbe Rubensa BM Porriño, disputarán entre deles un amigable este mércores, día 5 de xaneiro, véspera da festividade de Reis.
Tanto o equipo da Guarda como o do Porriño seguen traballando para a volta á competición que será esta fin de semana na Liga Guerreras Iberdrola, no caso do Mecalia Atlético Guardés. Por iso, teñen proxectado para mañá, mércores día 5, ás 12:00 do mediodía, un partido amigable.
O choque disputarase na Sangriña a porta pechada. Aínda que inicialmente, o encontro ía ter un carácter solidario, cunha recollida de alimentos en favor de varias ONG, lamentablemente tivo que cancelarse o acceso do público como medida de seguridade sanitaria diante a alta incidencia de contagios de coronavirus na comarca do Baixo Miño.
O choque servirá de pedra de toque para calibrar o estado físico das xogadoras que adestra José Ignacio Prades e Ismael Martínez, así como as súas sensacións sobre a pista, de fronte ao regreso da competición esta mesma fin de semana.
O conxunto miñoto recibe no Inferno da Sangriña ao C BM Morvedre (18:00 horas) para disputar o choque atrasado da sexta xornada da Liga Guerreras Iberdrola, aprazado no seu momento pola disputa da liga Europea por parte da escuadra guardesa.
O BM Porriño no volve á Liga Guerreras ata o 14 de xaneiro
A competición volve para todos os demais equipos, tamén para o Conservas Orbe BM Porriño a seguinte semana. A casualidade fai que as de Porriño se enfronten o sábado 14 de xaneiro, a partir das 21:00 horas xustamente co C BM Morvedre no Pavillón Municipal Internúcleos. Así, as de Sagunt (Valencia), terán ración dobre de balonmán galego para empezar o ano.
