Blanca Millán xa ten novo destino. A xogadora compostelá vén de completar a súa etapa na WNCAA, onde colleitou éxitos coas Black Bears da Universidade de Maine, e agora debutará en LF Endesa da man do SPAR Gran Canaria.
“Quero ir a un equipo que me axude a seguir mellorando e no que poida ter minutos porque o importante no primeiro ano é adaptarse á competición, que é moi diferente á liga universitaria. Todo o mundo sabe que se traballar duro, no SPAR Gran Canaria pódese progresas”, argumenta a escolta-alero.
Blanca Millán: “Afronto con moita ilusión esta etapa na illa de Gran Canaria”
A galega confía na súa experiencia na competición estadounidense para aportar valor ao equipo canario: “Os equipos buscan xogadoras que sexan capaces de anotar e defender. Na universidade fixen as dúas cousas e iso vaime axudar moito. Cada día hai que dar o máximo e as cousas irán chegando. Afronto con moita ilusión esta etapa na illa de Gran Canaria”.
O seu novo adestrador confía na compostelá
Nesta nova tempada, Millán competirá ás ordes de José Carlos Ramos, adestrador do SPAR Gran Canaria, e quen se mostrou satisfeito coa fichaxe da galega: “O noso obxectivo é axudala a medrar. É moi nova e ten moitas ganas de evolucionar no seu xogo. Ela quere triunfar en España e dar o salto á WNBA. Iso é importante, porque quererá ser unha das nosas referentes”.
José Carlos Ramos (adestrador do SPAR Gran Canaria): “É moi polivalente e incluso non ten medo a xogar preto do aro”
Neste sentido, o técnico asegura que a xogadora é “bastante anotadora e o pode facer desde distintos lugares do campo porque é capaz de actuar en diferentes posicións se é necesario. É moi polivalente e incluso non ten medo a xogar preto do aro. Malia a súa xuventude conta con moita experiencia. En ataque é anotadora. En defensa é moi traballadora e intensa”, asegura.
Moita experiencia na curta carreira de Blanca Millán
Blanca Millán deu os seus primeiros pasos no baloncesto no equipo do Peleteiro, na súa Santiago de Compostela. Chegada á idade universitaria, a galega tomou a decisión de ir a Estados Unidos, para competir na liga universitaria coa Universidade de Maine.
Durante a súa etapa como Black Bear, a alero foi proclamada unha das mellores cinco xogadoras da historia do equipo. Despois de sufrir unha lesión de xeonllo, a xogadora volveu aínda máis forte á pista, facendo unha tempada inesquecible.
“Traballei sen descanso e renunciei a volver a casa en verano, pero mereceu a pena”, declaraba a As Nosas, á fin do curso.
No seu último ano en Maine, a galega foi recoñecida como a mellor xogadora e mellor defensa do ano na America East, converténdose na primeira xogadora en obter ambos premios na mesma campaña.
Durante este derradeiro curso, tamén foi candidata aos Senior CLASS Awards, quedando finalmente dentro do First Team All-American da tempada, o quinteto ideal. Pouco despois foi declarada a mellor xogadora internacional.
Tal e como recolle o seu novo equipo, Millán asegura que “todos os premios e os triunfos son unha recompensa moi grande e di moito dos cinco anos que estiven alí, pero creo que o máis importante foi o que me fixeron medrar como persoa e a xente que coñecín, que é familia agora para min”.
A alero ten claro que “tiven moitísima sorte dentro e fóra da pista, porque desde o primeiro momento tratáronme moi ben. Déronme todo o que necesitaba para sentirme cómoda e como en casa estando tan lonxe dela”.
Rozando a WNBA
Finalmente, Millán non foi drafteada, pero tivo a oportunidade de desfrutar dunha semana de adestramentos co Washington Mystics.
Blanca Millán estará no ‘training camp’ do Washington Mystics, equipo da WNBA
“Foi unha semana intensa de adestramentos, na que sabía que era complicado quedarme no equipo. A nivel de baloncesto, competín sen problemas. As xogadoras que levan anos na liga están moi desenroladas, son moi fortes, moi áxiles e saben do que vai a cousa. Esa foi a maior diferenza. Téñome que poñer máis forte se quero competir na WNBA”, declarou ao SPAR Gran Canaria.
