Blanca Millán deixou xa de ser promesa do baloncesto para ser cada día unha xogadora máis consagrada. A baloncestista orixinal de Santiago de Compostela e actual xogadora dos Black Bears de Maine (E.U.A.), entrou no First Team All-American dos Senior Class Awards.
A xogadora, que chegou ao University of Maine na tempada 2015/2016, fixo unha gran tempada co cadro norteamericano que lle mereceu unha candidatura como finalista aos Senior CLASS Awards.
Blanca Millán, candidata ao Senior Class Award: “Xa é un premio estar entre as dez finalistas”
Finalmente, Millán non obtivo o galardón, pero dentro destes premios si obtivo o recoñecemento de entrar no First Team All-American da tempada. O quinteto complétano Rennia Davis (Tennessee), Dana Evans (Louisville), Michaela Onyenwere (UCLA) e Jill Townsend (Gonzaga).
Os éxitos de Millán
A galega foi nesta tempada a primeira xogadora en ser nomeada a mellor xogadora e defensa do ano dous veces no mesmo curso.
Dentro dos Black Bears, Millán é a 5ª na lista de anotadoras de toda a historia do equipo, con 1.974 puntos. Na súa competición, foi 15ª cunha media de 21,4 puntos por partido, liderando a costa Este en seis categorías. Ademais, a baloncestista liderou ao seu conxunto na consecución do título da liga regular e nas seis participacións consecutivas no campionato ligueiro.
Os premios Senior CLASS Awards
Os Senior CLASS Awards, acrónimo de celebración da lealdade e os logros permanecendo na escola (Celebrating Loyalty and Achievement for Staying in School) céntranse nos estudantes – atletas e promoven que os propios estudiantes usen a súa plataforma para facer un impacto positivo nas súas comunidades.
Para ser elixible, a estudante – atleta debe estar clasificada na NCAA Division I senior e acumular logros notables en catro areas: clases, comunidade, carácter e competición.
