Unha galega trunfa na NCAA, a liga universitaria norteamericana. Trátase de Blanca Millán, ex xogadora do ADM Peleteiro, e que milita actualmente no Black Bears. A baloncestista é finalista nos premios Senior Class Awards.
De Compostela aos EUA, a xogadora é xa unha das mellores e máis destacadas da súa competición. Dando os seus primeiros pasos na liga universitaria estadounidense na tempada 2015/2016, Blanca Millán sempre tivo en mente a posibilidade de compaxinar os seus estudos coa súa paixón: o baloncesto. As primeiras ofertas de universidades dos E.U. chegáronlle tras o europeo U15, no que había olleadores que quedaron encantados con ela.
Destino Maine
“Un deles púxose en contacto conmigo para ver se me interesaba vir. Como era unha idea que me rondaba na cabeza pareceume ben e comezaron a chegarme ofertas de universidades”, recorda.
A súa elección foi a universidade de Maine, xa que “había equilibrio entre o nivel académico e o deportivo, era un lugar pequeno onde podía concentrarme e podía encaixar na súa maneira de xogar e ter minutos”, explica.
Desde entón, Blanca Millán compite na liga NCAA, a seguinte detrás da profesional, a WNBA. Nela participan 32 conferencias de todo o país.
Blanca Millán: “O seu sistema universitario permite compatibilizar estudos e deporte”
Marchar aos Estados Unidos desde España para xogar non é algo fóra do común. A galega, estudante de Kinesioloxía e Educación Física, sinala que hai ao redor de 50 xogadoras nesta situación e considera que o principal motivo, ademais de progresar deportivamente, está en que “o seu sistema universitario permite compatibilizar estudos e deporte. Todo está organizado para que poidas adestrar, asistir a clase, viaxar e estudar, con esforzo pero con facilidades”.
Os premios Senior Class Awards
Cada tempada, os premios Senior Class Awards recoñecen o traballo dentro e fóra da pista das deportistas. O obxectivo deste galardón é premiar ás atletas – estudiantes que representan ás súas universidades
Os votos deste premios divídense en tres tipos: de xornalistas especializados, adestradores e afección. A última delas está aberta na súa páxina web, onde o público pode elixir á súa xogadora favorita. O periodo de votación pecharase o día 22 de marzo.
Vota por Blanca nesta ligazón!
Blanca Millán está entre as dez finalistas, converténdose así na primeira galega en optar a este premio. “É moi especial, porque ademais do aspecto deportivo, tamén ten en conta o académico e a nosa relación coa comunidade na que vivimos, con accións sociais que poden axudar ás persoas”, declara.
Blanca Millán: “Xa é un premio estar entre as dez finalistas”
A baloncestista recoñece que é complicado que sexa declarada gañadora (polo de agora Millán marcha segunda, cun 31,4% dos votos), pero afirma que para ela “xa é un premio estar entre as dez finalistas. Pero de recibilo, sería a primeira galega, incluso española creo, e iso sería todo un honor”.
O premio entregarase en San Antonio, na final da competición da NCAA, onde Blanca Millán compite cun equipo que estará na semifinal dos play offs desta fin de semana, 6 e 7 de marzo.
A competición estadounidense non escapa da COVID-19
De igual forma que está a suceder en España nas LF2 e Liga Endesa, as competicións estadounidenses tamén están a verse afectadas pola COVID-19.
Desde Maine, Millán explica que a tempada se está a desenvolver con moitas dificultades. “Os partidos xogáronse ida e volta na mesma fin de semana en días consecutivos, evitando avións e viaxando en dous autobuses para manter as distancias, con PCR diarias e sen público”, explica a xogadora.
Blanca Millán: “Foi unha tempada dura”
Desde os primeiros partidos atopáronse con hándicaps: “No estado onde vivo, Maine, non puidemos xogar os primeiros encontros porque xa equipos, cadro arbitral, etc sobrepasaban o límite de aforo e tivemos que xogar en casa do rival. Así que dura, foi unha tempada dura”, recalca.
Blanca Millán, a mellor xogadora e defensa do ano
A galega, capitá do Black Bears, xa acumula galardóns no seu palmarés. Por segunda vez, Millán foi premiada como a mellor xogadora e defensa do ano na America East, sendo a primeira en conseguir ambos premios no mesmo ano.
Blanca Millán, segundo informa a web foxbangor.com, foi convocada co All-Conference First Team. Con seu bo momento deportivo, a galega está a realizar unha tempada histórica co club universitario.
Congratulations to @Bmillan11 who becomes the ONLY woman in #AEHoops history to earn Player of the Year and Defensive Player of the Year twice in a career!#BlackBearNation pic.twitter.com/oNNRC5VOIW
— Maine Women’s Basketball (@BlackBearsWBB) February 26, 2021
