O BAXI Ferrol vén de facer pública a fichaxe da base Patri Benet. A xogadora valenciá xa militou nas filas do conxunto departamental na tempada 2014-2015 ás ordes de Lino López na Liga Feminina.
Segundo informan desde o propio club coa chegada desta xogadora, o equipo ferrolán reforza a súa “aposta en busca do retorno á máxima categoría do baloncesto feminino español, incrementando o nivel da súa plantilla. Ademais, vén cubrir unha posición na que o equipo que estaba un pouco curto de efectivos, xa que Marina Delgado non vai poder participar no que resta de tempada e, por iso, o club decidiuse a realizar esta incorporación”.
Patri Benet ascendeu a pasada campaña co Campus Promete, e esta campaña militaba nas Patatas Hijolusa Aros de León, no que estaba a facer unha gran tempada, xogando 36 minutos de media, anotando 11.6 puntos e dando 3.6 asistencias por partido.
Patri xa coñece a maneira de traballar de Lino López, adestrador doBaxi Ferrol, e comezou onte a preparar, co seu novo equipo, o próximo partido, estando previsto que debute o sábado na cancha do Insadyet Leganés.
Lino López: “Benet é moi competitiva é moi vertical ofensivamente e boa defensora”
O adestrador do conxunto ferrolán, Lino López, comenta sobre a chegada de Patri Benet que “é unha xogadora que achegará a súa experiencia en Liga Feminina 2 e en fases finais de ascenso. Xa xogou en Liga Feminina en Ferrol e é unha xogadora moi competitiva que ten unha gran capacidade de dirección e de anotar cando o equipo necesítao. É moi vertical ofensivamente e boa defensora e con moita intensidade”.
A xogadora valenciana destaca sobre o seu regreso a Ferrol que “a pesar de estar moi ben en León, tanto a nivel deportivo como persoal, expónseme esta opción e a verdade é que tiña ganas de formar parte deste reto. Valoreino coa miña familia e os meus amigos e decidín que tiña ganas de vir”.
En canto ao que pode achegar ao equipo, a base comenta que “a parte da miña experiencia, a miña intensidade, tanto en ataque como en defensa. Estou con moitas ganas e toda a ilusión de axudar ao equipo en todo o que sexa para cumprir os obxectivos do club”.
Esta tarde, ás 20.00 horas, no pavillón da Malata, a xogadora valenciá realizará a súa segunda sesión de adestramento co equipo.
